MU MBIMBILIYA mua kala umo mukanda u va luka nguavo Lute. Ua pua muzimbu ua handeka ha vumo vusoko vua yoyele ku matangua aze tele Isaleli va i tuamenena ku vangazi. Lute ua puile umo muana mpuevo ua ku cifuti ca Moave, ka puile kaIsaleli. Vunoni omo Lute ua lilongesele via Njambi ua vusunga, Yehova, ua putukile ku mu lema cikuma. Naomi ikeye ua longesele Lute via Yehova.

Naomi ua pua mpuevo ua kaIsaleli. Omo lia ndzala Naomi na yalieni na vana vavo vavali va ku Moave va vamala, va fumine mu Isaleli na ku nungulukila ku cifuti ca Moave. Kaha tangua limo yala lia Naomi ua tsile. Mua hitile imo miaka kaha vana va Naomi va ambatele vamo vana va vampuevo vavali va ku Moave mazina avo Lute na Olepa. Vunoni mu nima ya miaka 10, vana va Naomi va tsile. Naomi na vaze vana va vampuevo vavali va vuile vusiua vua kama! Vati honi ua lingile Naomi?

Tangua limo, Naomi ua kutile vungendzi vua ku hiluka kuimbo liavo. Lute na Olepa va tondele ku ya neni ngeci va  mu kavele. Vunoni mu vendele kamo ka ntunda, Naomi ua tengulukile ua leka vaze vana va vampuevo ngueni: ‘Hilukenu ku vindzivo via vanokuenu’.

Kaha Naomi ua va tsuembele mu ku va salesa. Kaha vakevo va putuka ku lila muomu va lemene cikuma Naomi. Va mu kumbulula nguavo: ‘Houe! Tu ka ya nove ku vantu vove’. Naomi ua kumbuluile ngueni: ‘Mu na pande ku hiluka vana vange. Ci ka pua ca cili nga mu ka kala ku vindzivo vienu’. Kaha Olepa ua hilukile kuimbo. Vunoni Lute ka tavele.

Kaha Naomi ua talele kuli Lute ua mu leka ngueni: ‘Olepa uze nai. Nove hiluka neni kuimbo’. Vunoni Lute ua mu kumbulula ngueni: ‘Kati u nji lambelele linga nji ku seze! Nji tave nji ye nove. Nji ka ya nove kuose ku u ka ya, nji ka kala kuose ku u ka kala. Vantu vove va ka pua vantu vange na Njambi yove a ka pua Njambi yange. Nji ka tsila ku u ka tsila va ka nji tsinda ku va ka ku tsinda’. Omo Lute ua manene ku handeka evi Naomi ka hasele naua ku mu leka linga a hilukemo.

Kaha va ka hetele ku Isaleli. Kukekuo ku va ka tungile. Vuasi-vuasi Lute ua putukile ku panga muaya mehia, muomu tele ntsimbu ya ku tia sevanda. Kua kele umo yala lizina lieni Mboase ua mu tavesele ku pupulula mu lihia lieni. Ua tantekeya iya naye ya Mboase ni? Naye ua puile uze Lahave ua ku mbonge ya Yeliko.

Tangua limo Mboase ua lekele Lute ngueni: ‘Va na nji leka viose vi ua lingile na ngozi i u na muesa kuli Naomi. Nji nevu nguavo u na seza va Iso na Noko, u na seza cifuti ca cisemua cove na vati u na hasa kua ku yoya mu kati ka vantu ka ua tantekeyele. Yehova a ku vezikise!’

Kaha Lute ua kumbulula ngueni: ‘U li na cikeketima kuli ange tata. Mezi a ua nji handekesa a na nji vuisa mua cili ku mutima’. Ngeci Mboase ua lemene cikuma Lute, kaha ka mua hitile ntunda ya kama va liambata. Aci singanieke ku viukilila ca Naomi! Vunoni ku viukilila ceni ca puile ca kama cikuma muomu Lute na Mboase va semene umo muana lizina lieni Ovende. Kaha ku lutue lua ntsimbu Ovende ua puile kuku ya Ndaviti, vunoni tu ka lilongesa vieni ku lutue.