UA TANTEKEYA eci ci va na tungu aha, ni? Yapua mbalaka ya ku lemesela Yehova. Va i luka naua nguavo tavenakulu. Vantu va  manusuile ku i tunga mu nima ya muaka umo mu va fumine ku Ingito. Ua tantekeya iya ua tumine ku i tunga, ni?

Yehova ikeye ua tumine ku i tunga. Mua kele Mosesa ku Muncinda, ua Sinai Yehova ua mu lekele vati aka i tunga. Ua mu lekele ngueni a i pange mu cifua cize ci tava ku i tsekula kaha na ku i tsekeka naua. Ngecize, ca asiuile ku ambata mitamba yaco na ku ka i tsekekela ku cihela cikuavo. Omo vaIsaleli vakele na ku enda fuma cihela ya cihela, mu zindinda, va ambatele mbalaka.

Nga u tala mu kahondo kakandende, ka li ku ntsongo ya mbalaka u monamo cimo cikasa. Cikasa caco va ci sana nguavo cikasa ca litavasiano. Ci li na tungelo ni vaselumbini vavali va olu, ku mantsongo avali. Njambi ua sonekele naua Masiko Likumi ha vitale vivali, muomu Mosesa ua tavuile aze a ku livanga. Vitale viaco va vi tulikile mu kati ka cikasa ca litavasiano. Mua kele naua ngandza ya manna. U ci vuluka ika yapua manna, ni?

Yehova ua hanguile Alone muanaye ya Mosesa, ku pua sasendote ua kama. Ue ku tuamenena vantu mu ku lemesa Yehova. Vana veni navo vasasendote.

Vuovuno honi tala eyi hondo ya kama ya mbalaka. Hondo yaco ya kama ku tuvakana ize ya indende luvali. Ua mono cikasa cacindende cize ci li na ku tsima muisi, ni? Ou ukeuo mutula u ve ku pangesa vasasendote mu ku tsimika amo mazi a vueko vua cili ava luka nguavo insensu. Kaha muli citumbiko ca vindeya vitanu na vivali. Cuma ca mu citatu ci li mu hondo ya kama, mesa. Ha mesa yaco hali vimbolo 12.

Mu lipela lia tavenakulu muli ciseya ni mbasiya ya kama, ya ku sula na mema. Vasasendote ve ku tanenaho ku mavoko na ku mikono. Kua kele naua mutula ua kama. Hakeho va kele na ku tsimikila tusitu mu ku pua cikombelo kuli Yehova. Mbalaka ili mpundu ha kati ka cilombo kaha vaIsaleli va tungile vimbalaka viavo ku mikulo yayo.