OMO vaIsaleli vendele vingonde vivali ku fuma ku Ingito, vaka hetele ku Muncinda ua Sinai u va sana naua nguavo Holeve. Oku kukekuo kuze ku cihela kua handekelele Yehova na Mosesa mu ciputa ca tuhia. Kaha vantu va tulilile ko na ku kalako ntsimbu ya indende.

Mosesa ua londele ku muncinda, ntsimbu vantu vakele na ku mu lavelela. Kaha mua kele helu lia muncinda, Yehova ua mu lekele ngueni a tonda vaIsaleli va mu ononoke na ku pua vantu veni va ku lifuila. Mu nima ya ku suluka, Mosesa ua lekele vaIsaleli mezi a mu tumine Yehova. Ngeci vantu va tavele nguavo va ka ononoka Yehova muomu va tonda ku pua vantu veni.

Yehova ua lingile vikomoueso. Ua lingisile ntsongo ya muncinda ku tsima muisi na ku neha mihiato. Kaha ua handekele naua na vantu ngueni: ‘Yange Yehova Njambi yenu uze ua mi tuhuile mu Ingito’. Kaha na va sika ngueni: ‘Kati mu ka lemese vanjambi veka ku vanga yange lika.’

Njambi ua va hele naua masiko akuavo atanu na auana. Kaha vantu va vuile vuoma vua kama. Ngeci va lekele Mosesa nguavo: ‘Tu handekeleko yove, muomu tuli na vuoma nga Njambi a handeka netu halumo tu tsa.’

Kaha Yehova ua mu lekele ngueni: ‘Londa kuno kuli ange, ku muncinda. Nji ka ku hana vitale via mavue ha nja soneka masiko a nji tonda linga vantu va a niunge.’ Kaha Mosesa ua kandukile naua ku Muncinda. Ua ka kalako matangua 40 na matsiki 40.

 Njambi ua kele na masiko a engi a ku hana ku vantu veni. Mosesa ua sonekele a masiko ose. Vunoni Njambi ua hele naua Mosesa mavue avali. Njambi mpundu Ikeye ua sonekele masiko 10 aze a handekele ku vantu vose. Va a luka nguavo Masiko Likumi.

Masiko Likumi apua masiko a seho ya kama. Vunoni kuli masiko akuavo a engi a hele Njambi ku vaIsaleli nao a seho. Limo liao lia handeka ngualio: ‘U ka lema Yehova Njambi yove na mutima uove uose, na mana ove ose, na muono uove uose, na ngolo yove yose.’ Likuavo ngualio: ‘U ka lema mukuenu ngue ove ivene.’ Muana Njambi, Yesu Kilistu ua handekele ngueni aa masiko avali akeo a seho ya kama cikuma-kuma, a hele Yehova ku vantu veni vaIsaleli. Ku lutue amba tu ka lilongesa viuma via vingi hali Muana Njambi na vilongesa vieni.