UA TANTEKEYA iya ou mpuevo ua ku vuaha, a li na ku iza mu ku liuana na Ndaviti? Lizina lieni Avingaile. Ua kala na mutima ua cili, ua kandele Ndaviti mangana kati a linge vupi vua kama. Vunoni ntsimbu kanda tu ci lilongese viaco evi, tu ci tantekeya vika Ndaviti ua kele na ku lihita navio.

Omo Ndaviti ua sevunukile kuli Saulu ua ka vandele mu mpako ya livue. Vamuanaye na va vusoko vueni vose va na i neni. Ndaviti a li na vamala  va ku pua 400 kaha ikeye ua pua ntuamena yavo. Kaha Ndaviti ua ile kuli muangana ua Moave ua ka mu leka ngueni: ‘Sukulukambu, nji tave linga nana na tata va ku kale kuno noho nji ka tantekeya viuma vika nji solokela’. Kaha Ndaviti na vamala veni va na i na ku vanda ku malundu.

Mu nima yevi mukemuo honi Ndaviti na ka liuanene na Avingaile. Yalieni Navale ua puile mpite kaha ua kele na mehia a engi. Ua kele na vampanga 3.000 na vampembe 1.000. Navale ua puile cilumbi. Vunoni mpueyeni Avingaile ua puile ua ku lelema. Avingaile ua puile muntu ua cili. Ntsimbu imo uovuele vusoko vueni. Tu ci mone.

Ndaviti na vamala veni va muesele ngozi ya kama kuli Navale. Va mu kuasele ku niunga vampanga veni. Ngeci tangua limo Ndaviti ua tuma vamo ku vamala veni kuli Navale linga a ka va haneko vumo vukuasi. Kaha vamala va Ndaviti va neza kuli Navale va na mu uana na vantu veni o ku vali na ku teula maka ku vampanga. Eli li na pu litangua lia ndzolela, Navale a li na via-ku-lia via vingi. Kaha vamala va Ndaviti va na leka Navale nguavo: ‘Tua muesele ngozi ya kama kuli yove. Ka tua pundile na umo ua vampanga vove vunoni tua ku kuasele ku va niunga. Tua ku vundila tu haneko vimo via-ku-lia’.

Kaha Navale ua va lekele ngueni: ‘Ka nji ku hana via-ku-lia viange ku vantu ngeci muenu’. Ua va siluile na ku handeka mezi a api hali Ndaviti. Omo ava vamala va hilukile kuli Ndaviti va ka mu lekele viuma viose, kaha ua niengua cikuma. Ngeci ua lekele vantu veni ngueni: ‘Sueleni mikuale yenu!’ Kaha va kutile vungendzi linga va ka tsihe Navale na vantu veni.

Umo ua ku vamala va Navale, ua vuile aze mezi a ku pihia a handekele Navale, kaha ua lekako Avingaile. Kaha Avingaile ua viukisile vimo via-ku-lia. Kaha ua vi londeka ha cimulu ua putuka ku sesa Ndaviti. Omo ua liuanene na Ndaviti ua sulukile ha cimulu na ku tsikama ha mavuli ua handeka ngueni: ‘Sukulukambu muangana kati u halakane mezi a yaliange Navale. Ua pua cisiname ue ku linga via vusiname. Vuana ovu. Sukulukambu vu tambule, tu ecele ku viose vi tua ku vulumuina’.

Ndaviti ua kumbuluile ngueni: ‘Ove u mpuevo ua mana u na nji lingisa ku likela ku lingula ku vupi vua Navale. Hiluka kuimbo mu ciyulo’. Kaha ku lutue lua ntsimbu omo Navale ua tsile, Ndaviti ua Ambatele Avingaile na ku pua umo ua vampuevo veni.