VAFILISTEO va neza naua mu kua ku lua na vaIsaleli. Vamuanaye ya Ndaviti va vakuluntu, va na kovela vusualale mu civunga ca Saulu. Tangua limo Njese ua tumine Ndaviti ngueni: ‘Tentula vimbuto via ku oca na vivalavala via mbolo u tualele vamuanoko. Na ku ka tala vati vali’.

Omo Ndaviti ua ka hetele ku cilombo ca masualale, ua tuntilile ku ndzita linga a ka tonde vamuanaye. Kua kele umo Ngoliata, yala ua ku tuntuka ua vaFilisteo ua kele na ku iza mu ku sahula vaIsaleli. Ua kele na ku va sahula ku cimene na ku cinguezi mu matangua 40. Ua kele na ku tambeka ngueni: ‘Hangulenu umo yala linga a ku lue nange. Nga a nji vula na ku nji tsiha, kaha tu ka pua vandungo venu. Vunoni nga nji ku mu vula na ku mu tsiha, mu ka pua vandungo vetu. Enu ka muesi na umo a hasa ku lua nange’.

Ndaviti ua huile vamo masualale ngueni: ‘Vika va ka fueta muntu aka tsiha ou kaFilisteo na ku fumisa kasahuntu mu Isaleli?’

Masualale va mu kumbulula nguavo: ‘Saulu a ka mu fueta vupite vua vuingi, kaha aka mu hana naua muananeni ua mpuevo mu ku pua mpueyeni’.

Vunoni vaIsaleli va li na vuoma muomu Ngoliata ua kama cikuma. Vulaha vueni vi metulu 3, kaha a li na lisualale mukua ku mua ambatela ntelo yeni.

Vamo masualale va na i na ku leka Muangana Saulu nguavo Ndaviti a tonda ku lua na Ngoliata. Vunoni Saulu na leka Ndaviti ngueni: ‘Ka u hasa ku lua nou kaFilisteo. Yove u kanike ua mundende ou yala ua pua lisualale fume ku vukuendze  vueni’. Vunoni Ndaviti ngueni: ‘Nja tsihile ursu na ndumba mu va tondele ku kuata vampanga va tata. Nou kaFilisteo nji ka mu puisa ngue umo uavo. Yehova a ka nji kuasa’. Kaha Saulu ua mu leka ngueni: ‘Ya, Yehova a kale nove.’

Ndaviti ua sikuluka ku kana ka ndonga na ku nona mavue, na ku a haka mu sulau yeni. Kaha na ambata fisika yeni na ku ya mu ku liuana na Ngoliata. Omo Ngoliata ua mu muene, ua sembuluile. Ua singaniekele ngueni ca casi ku tsiha Ndaviti.

Kaha Ngoliata ngueni: ‘Tuaya linga nja ku hane muvila uove ku tuzila na tusitu va ka lie’. Vunoni Ndaviti ua kumbulula ngueni: ‘Yove u li na kuiza kuliange na mukuale, na likunga na njelua, vunoni ange nji iza kuli ove mu lizina lia Yehova. Lelo Yehova a ka ku hana mu livoko liange kaha nji ka ku tsiha’.

Kaha haze vene Ndaviti ua tuntila kuli Ngoliata na ku nona livue mu sulau yeni na ku li haka mu fisika, ua mu asa na ndzili yeni yose. Livue lia ile mu mutue ua Ngoliata kaha ua uile na ku tsa! Omo vaFilisteo va muene mukuluntu uavo na u, vose va tengulukile na ku tina. Ngeci vaIsaleli va kaveleko kaha va ka vulile ndzita.