UA MONO vika vi na soloka aha? Ou mukuendze na putula muana mpanga ku ursu. Uze ursu uezile na ku niangula muana mpanga linga a ka lie. Vunoni ou mukuendze na mu sekula ngeci na ka hasa ku tsakununa muana mpanga ku kanua ka ursu. Kaha ursu mua vuangumukile, ngeci mukuendze ua mu tsiha! Ntsimbu ikuavo ua patuile naua mpanga u va kuatele ku ndumba. Ou mukuendze ua puile ua ku takama, ni vati? Ua tantekeya lizina lieni?

Ikeye mukuendze Ndaviti. Ua kala ku mbonge ya Mbetelema. Muzikulu ua Ovende, muana Lute na Mboase. Ua va vuluka, ni? Kaha ise ya Ndaviti ikeye Njese. Ndaviti ue ku niunga vampanga va ise. Fume Yehova ha hanguila Saulu ku pua muangana mua hitile miaka 10, amba vuose Ndaviti ua semukile.

Omo ntsimbu ya hetele Yehova ua tumine Samuele ngueni: ‘Tentula ntsazi ya mazi kaha ya ku ndzivo ya Njese mu Mbetelema. Nji na hangula umo ua vana veni linga a pue muangana’. Omo Samuele ua muene muana Njese ua mukuluntu Eliave, kaha ngueni: ‘Ou ikeye vene ya na hangula Yehova’. Vunoni Yehova ua mu leka ngueni: ‘Kati u tale vulaha ni ku sungama ca muvila ueni. Ka nja mu hanguile kupua muangana’.

Kaha Njese ua nehele muaneni Avinandave kuli Samuele. Vunoni Samuele ngueni: ‘Houe, ou kati ikeye ya na hangula Yehova’. Ngeci Njese ua sanene naua muaneni Sama. Kaha Samuele ngueni: ‘Houe nou vene Yehova ka mu hanguile’. Kaha ua nehele vana veni va ku pua vatanu na va vali vunoni Yehova ka hanguileho na umo uahi. Kaha Samuele ua mu hula ngueni: ‘Hakeho ha vapua vana vove va vamala ni?’

Njese ua mu kumbulula ngueni: ‘Kua lisupu umo ua kanike vunoni na i mu ku lisa vampanga’. Omo va ka hiangele Ndaviti, Samuele ua mu muene ngecize ua puile mukuendze ua ku sungama. Kaha Yehova ua mu lekele ngueni: ‘Ikeye mpundu ou i nja hangula, katuka u mu vuavese’. Kaha Samuele ua lingamo. Amba Ntsimbu i heta linga Ndaviti a ka pue muangana ua Isaleli.