EYI fikula i lekesa palandaizi ngue mua muesele Njambi kuli kapolofeto Isaya. Isaya ua yoyele mu nima ya ku tsa ca Yona.

Palandaizi ya lomboloka “lihia” ni “citungu”. Eci citungu ci ku vuluisa vimo vi tua lilongesele ku nima, mu livulu lino, ni vati? Ca lifua na cize citungu ca cili ca hele Yehova Njambi kuli Andama na Eva, ni vati? Vuno mavu ose tangua a ka pua palandaizi, ni?

Yehova ua lekele kapolofeto Isaya linga a soneke via palandaizi ize i keza ku lutue muze mu ka kala vantu va Njambi. Njambi ua handekele  ngueni: ‘Tungunga va ka kala hamo na vampanga. Muana ngombe na mukuendze ua ndumba va ka lia hamo, kaha kanike ua mundende aka va lisa. Cipue kakeke ka ka vulumuka nga aka heha na linoka ua vusungu’.

Vamo ve ku handeka nguavo: ‘Evi ka vi ka kalako muomu, hano ha mavu ha kala vupi ntsimbu yose, kaha kasi ha vu ka kala’. Vunoni aci singaniekeho mua cili: Yehova ua hele limbo lia ku fua vati kuli va Andama na Eva?

Njambi ua hakele va Andama na Eva mu palandaizi. Omo lia ku muesa lisino kuli Njambi, va Andama na Eva va zimbalesele limbo liavo kaha va kulupile na ku tsa. Njambi ua kulahesa ngueni tangua a ka hana vantu vose va mu lema vize vi va zimbalesele va Andama na Eva.

Ka kuesi na vimo viahi vika hasa ku vulumuna ni ku pihisa mu palandaizi ya iha ili na kuiza. Ku ka kala ciyulo ca ku tantuluka. Vantu vose va ka kala na cihindu na ndzolela. Njambi aka puisa viuma viose ngue muze mu via puile ha katete. Vunoni tu ka lilongesa vati Njambi aka vi puisamo.