FUME ha ku tsa ca Muangana Yelovoame, vamiangana vose va kele na ku sintsila ha vuangana vua miyati 10 ya ku vucelo va kele na ku linga lika via ku pihia. Vunoni Muangana Ahave ua puile ua ku pihia ku tuvakana vose. Ua tantekeya omo lia vika? Cuma cimo ca mu lingisile ngoco, omo lia mpueyeni ua ku pihia, Lisano Yezevele.

Yezevele ka puile kaIsaleli. Ise ua puile muangana ua ku Sindone. Yezevele ua kele na ku lemesa njambi ua makuli Mbale kaha ua kele na ku tuala Ahave na vamo vaIsaleli mu ku lemesa Mbale. Yezevele ua zindile Yehova ngeci ua tsihile vapolofeto va vengi. Kaha vamo va tinine na ku ka vanda ku malundu ku tina va va tsihe. Yezevele nga tonda vimo a hasa ku tsiha muntu linga a tambule via tonda.

Tangua limo Muangana Ahave ua kele na vusiua vua kama. Kaha Yezevele ua mu hula ngueni: ‘Vika u li na vusiua ngecize lelo?’

Kaha ikeye ua kumbulula ngueni: ‘Omo lia mezi a na nji handeka Navote, nja tondele ku landa lihia lieni lia viniu. Vunoni ka nji tavele’.

Yezevele ngueni: ‘Kati u linienge, nji ka ku hana lio yange’.

Kaha Yezevele ua sonekelele mikanda kuli vamo vamiata va mu mbonge mua kele Navote ngueni: ‘Hangulenu vamo vamala va ngoco linga va ka vangeye Navote nguavo na singi Njambi na muangana, kaha mu ka tuhula Navote hambandza linga mu ka mu ase mavue’.

Omo Yezevele ua tantekeyele ngueni Navote na tsi, ua lekele Ahave ngueni: ‘Ya honi u ka tambule citungu ceni ca viniu’. Yezevele ua pandele ku tambula kasitiku omo lia vupi vua lingile, ni vati?

Ngeci Yehova ua tumine Yehu linga a ka hane kasitiku kuli Yezevele. Omo Yezevele ua vuile nguavo Yehu a li na ku iza, ua liviukisile ku meso na ku mutue linga a leleme. Vunoni mua hetele Yehu, kaha ua muene Yezevele ha njanena, ua tambakanene vamala va kele mu ndzivo ya muangana ngueni: ‘Mu andumunenu!’ Kaha vaze vamala va lingilemo, ngue mu na mono aha ha fikula. Va mu andumuine, ngeci ua tsile. Mukemuo mua tsile Lisano Yezevele.