UA TANTEKEYA omo lia vika ou yala a li na ku vundila kuli Yehova? Na vika na zandumuina ize mikanda ku lutue lua mutula ua Yehova ni? Ou yala ikeye Hezekiya. Ua puile muangana ua miyati ivali ya Isaleli ya ku vutokelo. Ua kele mu vukalu vua kama. Omo lia vika?

Muomu masualale vaAsilia va na nongesa laza vuze vuangana vua miyati 10 vua ku vucelo. Yehova necelela linga va vu nongese muomu vantu vaco vakele na ku linga vupi vua kama cikuma. Vuovuno masualale vaAsilia va neza mu kua ku lua ndzita na miyati ivali.

Muangana ua Asilia na tumu mikanda kuli Muangana Hezekiya. Ikeyo ize ya na hake  haze Hezekiya, ku lutue lua mutula ua Njambi. Va na sonekamo via ku sahula Yehova kaha va na sonekamo nguavo Hezekiya a likele lika. Ngeci mukemuo Hezekiya a li na ku vundila ngueni: ‘A Yehova, tuovole kuli muangana ua vaAsilia. Linga vifuti viose va tantekeya ngecize yove lika u Njambi’. Vuno Yehova ua halakanene kuli Hezekiya, ni?

Hezekiya ua puile muangana ua cili. Ka puile ngeci mua vaze vamiangana va vapi va ku miyati 10 cipue ngue ise, Muangana Ahaze. Hezekiya ue ku ononoka ku masiko a Yehova ose. Kaha mua manene Hezekiya ku vundila, kapolofeto Isaya ua mu tumine umo muzimbu ua ku fuma kuli Yehova ngueni: ‘Muangana ua Asilia ka li ka kovela mu Yelusalema. Na umo lisualele lieni a ka suena mu hiehi uahi. Kaha ka va ka asa na umo mungamba mu mbonge’.

Tala ha fikula ili aha. Ua tantekeya veya ava masualale va na lundumuka ngeci? VaAsilia. Yehova na tumine kangelo keni mu vutsiki vumo kaha na ku tsiha masualale vaAsilia va ku pua 185.000. Ngeci muangana ua vaAsilia ua hilukile kuimbo.

Vuangana vua miyati ivali vu novoka kaha vantu va yoyele mu ciyulo mu ntsimbu ya indende. Vunoni omo Hezekiya ua tsile, Manase muaneni ua sintsile ha vuangana. Manase na muaneni Amone va puile vamiangana va ku pihia. Kaha cifuti ca sulile na luozi na vupi. Kaha omo Muangana Amone va mu tsihile ku vangamba veni va hakeleho muaneni Yosiya ua puile muangana ua miyati ivali.