UA TANTEKEYA veya ava vamala na vika va li na ku linga, ni? Va li na ku ya ku ndzita, ava vamala va na tuama ku lutue va li na ku kuimba. Vunoni halumo u hasa ku lihula nguove: ‘Omo lia vika ava vakua kuimba ka vesi na mikuale na makunga a ku luisa?’ Tu ci tale omo lia vika.

Yehosafate ua pua muangana ua miyati ivali ya Isaleli. Ali na ku yoya mu ntsimbu imo na Muangana Ahave na Yezevele va ku miyati 10. Vunoni Yehosafate ua pua muangana ua cili na ise Asa neni ua puile muangana ua cili. Ngeci mukemuo vantu va ku miyati ivali ya ku vutokelo vali na ku yoya muono ua cili.

Vunoni kua soloka vimo vi na kokela vantu vuoma. Tunganda va neza mu ku leka Yehosafate nguavo: ‘Li civunga lia kama lia masualale vaMoave, vaAmone na vakua Muncinda ua Seile vali na kuiza mu ku mi  luisa’. Ngeci vaIsaleli va vengi va na likunguluila ku Yelusalema mu ku vundila vukuasi kuli Yehova. Va na i ku tembele kaha kuze Yehosafate na vundila ngueni: ‘A Yehova Njambi yetu, ka tu tantekeya vika tua pande ku linga. Ka tuesi na ngolo ya ku lua neci civunga ca kama. Tua ku vundila linga u tu kuase’.

Yehova na halakana civundilo cavo, ngeci na tumu umo ngamba yeni a ka leke vantu ngueni: ‘Eyi ndzita kati yenu, vunoni ya Njambi. Ka mu ka lua. Mu ka mana lika, na ku tala vati Yehova a ka mi ovola’.

Kaha lia mukuavo cimene, Yehosafate ua lekele vantu ngueni: ‘Tsilielenu Yehova!’ Kaha na hake vakua kuimba ku lutue lua civunga ca masualale, oku va caula na kuimbila Yehova. Ua tantekeya vika vi na soloka mu va ile ku ndzita, ni? Yehova ua lingisile vitozi vavo ku litengulukila na ku litsiha vavene. Kaha mu va ka heteleko, va ka uanene masualale vose va na tsi!

Yehosafate ua puile ua ku zangama ngeci ua tsilielele Yehova, ni vati? Netu tu pua vakua mana nga tu tsiliela Yehova.