YOSIYA ua kele na miaka itanu na itatu mu va mu hakele ku pua muangana ua miyati ivali ya Isaleli ya ku vutokelo. Tele kanike ua mundende cikuma kupua muangana. Vunoni ha katete vamo vakuluntu va mu kuasele ku sika cifuti.

Omo Yosiya ua puisile miaka itanu na ivali ha vuangana, ua putuka ku lengeya Yehova. Kaha ua kavele lungano lua vamiangana ngeci mua Ndaviti , Yehosafate na Hezekiya. Omo tele a ci li kankavala, Yosiya ua lingile viuma via ku kaluka.

Cingi ca vantu va mu Isaleli va puile va ku pihia cikuma. Muomu va kele na ku lemesa vanjambi va makuli. Vakele na ku tsikamena tumponia. Ngeci Yosiya na vamala veni va putukile ku fumisa ku lemesa ca makuli mu cifuti. Eci ca puile cipanga ca kama cikuma, muomu vantu va vengi va kele na ku lemesa tumponia. Tala Yosiya na vamala veni mu va li na ku puzuola tumponia.

Fume haze, Yosiya ua hanguile vamala vatatu linga va tuamenene cipanga ca ku tungulula tembele ya Yehova. Va kunguluile zimbongo ku vantu kaha va ka vi hana kuli vamo vamala linga va hase ku fueta ku vipanga viaco. Omo va kele na ku tungulula tembele sasendote ua kama Hilikiya, ua uanene cimo cuma ca seho ya kama. Ua uanene mukanda ua  laza cikuma, uze mpundu ua kala na masiko a Yehova a sonekele Mosesa. Mukanda uaco ua zimbalele laza.

Kaha omo va na u tualele kuli Yosiya, ua tumine ngueni va u tande. Omo Yosiya ua halakanene vi va kele na ku tanda, ua tantekeyele ngueni nkuma vantu ka va kele na ku niunga masiko a Yehova. Ngeci ua vuile vusiua vua kama kaha ua tavula cikovelo ceni, ngue mu u na mono aha. Kaha ua handekele ngueni: ‘Yehova a li na vutenu vua kama netu, muomu vatatetu ka va niungile masiko ava soneka mu mukanda ou’.

Yosiya ua tuma sasendote ua kama Hilikiya a ka hule vati Yehova a ka va panga. Ngeci Hilikiya ua ile mu ku hula kuli umo kapolofeto ua mpuevo, lizina lieni Hulunda. Kaha Hulunda ua mu hele muzimbu ua ka leka Yosiya, ua ku fuma kuli Yehova, ngueni: ‘Yelusalema na vantu vose va ka va hia kasitiku muomu va na lemesa vanjambi va makuli kaha va na sulisa cifuti na vupi. Vunoni muomu ove Yosiya u na lingi via cili, kasitiku ka co ka keza lika mu nima ya ku tsa cove.’