MUANGANA Nevukaneza ua tualele vaIsaleli vose va ku zangama na va ku lilongesa ku Mbambilone. Kaha ha kati kavo muangana ua hanguileho vaze vakua mana va ku sungama. Vamo va ku vakuendze vaco vakevo ava vauana vali aha. Umo uavo Ndaniele na vakuavo vatatu va Sandelake, Mesake, na Avende-nengo, aa mazina va va lukileo ku Mbambilone.

Nevukaneza a li na vutumbe vua ku longesa ava vakuendze, linga va ka pangele ku nganda yeni. Mu nima ya ku tambula vilongesa miaka itatu, muangana aka hangulaho lika vaze va mana, linga va ka mukuase ku sompa vimpande. Muangana a tonda ngueni vakuendze vaco va pue va ku kaniama kaha naua va kale na cihindu ca cili. Ngeci na tumu vangamba veni ngueni va na pande ku va hia via-ku-lia via cili na viniu, ngue vize vie ku lia ikeye na vakua ndzivo yeni.

 Tala mukuendze Ndaniele. Ua tantekeya vika a li na ku leka Asepenaze kasongo ka Nevukaneza ni? Ali na ku mu leka ngueni ka tondo ku lia vize via-ku-lia via cili via ku mesa ya muangana. Vunoni Asepenaze na lisosomua cikuma, ngeci na mu kumbulula ngueni: ‘Muangana na sika laza via-ku-lia vi mua pande ku lia na vize vi mua pande ku nua, kaha nga ka mu ka lelema na ku kala na cihindu ca cili ngue vakuenu, halumo a ka nji tsiha’.

Kaha Ndaniele ua ile kuli mukuluntu uze ya hangula Asepenaze, linga a niunge ikeye na va vusamba veni vatatu. Kaha ua handekele neni ngueni: ‘A ci tu eseke mu matangua 10, tu hie lika vifuofuofuo kaha na mema aku nua. Kaha u ka tu setekesa na vakuetu vakuendze vaze vali na kulia via ku mesa ya muangana, linga tu ka mone veya va lelema cikuma’.

Kaha mukua ku va niunga ua tavele ku lingamo. Mu nima ya matangua 10, Ndaniele na vasamba veni vatatu va, lelemene cikuma na ku sungama ku tuvakana vakuavo vakuendze. Ngeci kasongo ua vecelele va tualeleho ku lia vifuofuofuo, kati naua via-ku-lia via muangana.

Mu ya huile miaka itatu, vakuendze vose va va tualele kuli Nevukaneza. Mu nima ya ku handeka navo vose, ua hanguileho Ndaniele na va vusamba veni vatatu, va ku sungama ku tuvakana vakuavo vose. Kaha ua va hanguile linga va kale mu nganda yeni, va pue na ku mu kuasa. Va Ndaniele, Sandelake, Mesake, na Avende-nengo va kele na mangana aku konka visoti na vihula viose via kele navio muangana. Va hianene vasasendote ni nguetu vamala vose vakua vingombo, lua kupua 10 ku mangana mu ku konka zimpande.