TALA Samuele a li na ku muaniena mazi ha mutue ua ou yala. Evi vikevio vi va kele na ku linga ku muntu uze i va na hangula ku pua muangana. Yehova ikeye na tumu Samuele a muaniene mazi ha mutue ua Saulu. Aa mazi a seho a kala na vueko vua cili cikuma.

Saulu ka singaniekele ngueni a ka pua muangana. Ngeci ua leka Samuele ngueni: ‘Nja fuma ku muyati ua Mbenjamini, muyati ua ku keha cikuma mu Isaleli. Vika u handekela nguove nji ka pua muangana?’ Yehova ua tondele Saulu muomu kati mukua ku lihalesa cipue ku lipamba. Ngeci ua mu hanguile ku pua muangana.

Vunoni Saulu ka puile cihutu ni yala ua ku hona seho. Va vusoko vueni vampite, kaha ua puile ua laha, ua ku sungama. Ua laha ku tuvakana vose va kele mu Isaleli! Ua puile naua mukua ku tunta cikuma kaha mukua ndzili ya kama. Vantu va viukililile omo Yehova ua hanguile Saulu ku pua muangana. Ngeci vose va putukile ku tambeka nguavo: ‘Muangana a yoye ntsimbu ya kama!’

Vitozi va Isaleli va tualeleleho ku lua na ndzili ya kama ngue muze mua laza. Kasi va kele na ku yandesa cikuma Isaleli. Omo va tumbikile Saulu ha vuangana vakua Amone vezile mu ku lua na Isaleli. Vunoni Saulu ua kunguluile masualele va vengi ua ya navo ku ndzita ngeci ua ka vulile. Kaha vantu va putukile ku viukilila cikuma omo lia ku va hanguila Saulu ku pua muangana uavo.

Mu ku hita ca miaka, Saulu ua kele na ku tuamenena vaIsaleli ku vindzita via vingi, kaha va ka kele na ku vula vitozi viavo. Saulu ua kele naua na muaneni ua ku takama, lizina lieni Yonatase. Yonatase neni ua kuasele vaIsaleli ku vula vindzita via vingi. Vunoni kasi vaFilisteo va tualeleleho ku pua vitozi va ku pihia va Isaleli. Tangua limo kuezile makulukazi a makulukazi a vaFilisteo mu ku lua na vaIsaleli.

Kaha Samuele ua lekele Saulu ngueni a mu lavelele linga a ku hane cikombelo ni vuana kuli Yehova. Vunoni Samuele ua kotokelele kuiza. Ngeci Saulu ua kele na vuoma ngueni halumo vuovuno vaFilisteo va  katula ndzita, ngeci ua hele ivene cikombelo. Mua ku hetele, Samuele ua lekele Saulu ngueni na muesa lisino. Kaha naua ngueni: ‘Yehova a ka hangula muangana ueka linga a sike Isaleli.’

Mu nima ya ntsimbu, Saulu ua muesa naua lisino kuli Yehova. Ngeci Samuele ua mu lekele ngueni: ‘Ku-ononoka Yehova ca hiana ku mu hana vuana vua mpanga ua cili. Muomu ka ua ononokele kuli Yehova, Yehova na ku viana u pue muangana ua Isaleli.’

Ha muzimbu ou tu lilongesaho cuma ca seho. Tu lilongesaho ngecize ku-ononoka kuli Yehova ntsimbu yose ca pua ca seho ya kama. Kaha naua tu lilongesa nguetu muntu ua cili ngeci mua puile Saulu, a hasa ku himpuka ua mupi. Vunoni yetu ka tu tondo ku pua vantu va vapi, ni vati?