SOLOMONE na kovela ha vuangana a ci li mukuendze. Ua lema Yehova, kaha ue ku niunga vimamuna via mu hele ise Ndaviti. Yehova ua lema Solomone, ngeci vutsiki vumo ua handekele neni mu ndzozi, ngueni: ‘Solomone, vundila vika nji ka ku hana?’

Kaha Solomone ua kumbulula ngueni: ‘Yehova Njambi yange, ange nji kanike, ka nji tantekeya vati veku sika ha vuangana. Nja ku vundila, nji hie mana a ku sika vantu vove mua cili.’

 Yehova na viukilila na civundilo ca Solomone. Ngeci na mu leka ngueni: ‘Muomu u na vundila mana, kati vupite cipue ku yoya miaka ya ingi, nji ka ku hia mana a engi ku tuvakana vantu vose va yoyele laza ha mavu. Nji ka ku hana naua na vize ka ua vundilile, vupite na vumpahu’.

Mu nima ya ntsimbu ya indende, kuezile vampuevo vavali kuli Solomone va kele na cimpande ca kama. kaha umo uavo ua handeka ngueni: ‘Ou mpuevo ua kala nange mu ndzivo imo lika’. Ange nja semene muana ua yala, kaha mu nima ya matangua avali neni ua kuatele muana ua yala. Kaha tangua limo, ku vutsiki ou mukuetu muaneni ua tsile. Vunoni ange tele nja kosa ua tambula muaneni ua ku tsa ua ku mu langeka kuli ange na ku tambula muanange. Kaha mu nja niangumukile nja mona kakeke ua kutsa, nji mu tale muacili kati uange’.

Kaha uze mpuevo mukuavo ngueni: ‘Houe! Ou muana a li na muono ikeye uange, ou ua kutsa ikeye ueni!’ Kaha mpuevo ua katete ngueni: ‘Houe! Uze ua kutsa ikeye uove, uange ou a li na muono!’ Mukemuo mu va kele na ku licokota. Solomone a linga vati?

Kaha ua tuma ku mu nehela mukuale, mu va nehele ua handeka ngueni: ‘Tavulenu ou kakeke ha kati linga va litepeleye’.

Naye ya kanike mpundu ua lila ngueni: ‘Houe!’ Sukulukambu kati mu tsihe kakeke. Mu hienu kuli ikeye!’ Vunoni ou mpuevo mukuavo ngueni: ‘Kati mu mu hie kuli ikeye cipue kuliange mu tavulenu ha kati’.

Kaha Solomone ua handeka ngueni: ‘Kati mu tsihe kakeke! Mu hienu kuli ou mpuevo ua katete. Muomu ikeye naye’. Solomone na tantekeya ngecize naye ya muana mpundu ua mu lema cikuma, ngeci na tondele ngueni va mu hie kuli mukuavo linga kati va mu tsihe. Omo vantu va vuile vati Solomone ua sompele cimpande caco, va viukilile cikuma, mu ku kala nou muangana ua mana.

Mu miaka ya ku sika ca Solomone, Njambi ua vezikisile vantu na mavu kaha ua lingisile vimbuto via vingi ku-ima ngeci mua miti ya viniu, tiliku, sevanda, zinkuyu na via-ku-lia vieka na vieka. Vantu va zalele vuzalo vua cili na ku yoya mu vindzivo via cili. Kua kele viuma viose via cili vi va tondele vantu.