UA TANTEKEYA vika a li na ku handeka aha ou muana mpuevo? A li na ku leka ou mpuevo via kapolofeto Elisa, na viuma via cili vie ku linga na ngolo ya Yehova. Ou mpuevo ka tantekeya via Yehova muomu ka puile kaIsaleli. Tu ci mone omo lia vika ou muana mpuevo a li ku ndzivo you mpuevo.

Ou mpuevo ua pua kaSilia. Yalieni ikeye Namane, mukuluntu ua masualale va mu Silia. VaSilia va ka kuatele ou muana mpuevo ua ku Isaleli kaha va mu neha kuli mpuevo ya Namane linga apue ngamba yeni.

Namane ua kele na vuvezi vua ku pihia cikuma vuva luka nguavo mbumba. Ovu vuvezi vu hasa ku lingisa minie ya muntu ku punduka. Ngeci mukemuo ou muana mpuevo a li na ku leka mpuevo ya Namane ngueni: ‘Muangana uange, nga na ci ile ku Isaleli kuli kapolofeto ua Yehova. Nga a ka mu kanguisa ku mbumba’. Kaha uze mpuevo ua ku lekeleko yalieni.

 Namane ua tondele mpundu ku mu kanguisa; ngeci ua ile ku Isaleli. Mua hetele kuze, ua ya ku ndzivo ya Elisa. Kaha Elisa ua tumako ngamba yeni ku ka leka Namane linga aka tane lutanu na luvali mu Ndonga ya Yondau. Aze mezi a nienguesele cikuma Namane kaha ua handeka ngueni: ‘Vindonga via kuimbo lietu via cili cikuma ku tuvakana vindonga viose via mu Isaleli!’ Mua manene ku handeka evi ua katukile na ku ya.

Vunoni vangamba veni va mu lekele nguavo: ‘Muangana, nga Elisa na ku tumine ku linga via vikalu nga u na vi lingi, u hona ku linga eci cuma ca casi ni?’ Namane ua halakanene mezi a vangamba veni na ku ka mbuitama mu Ndonga Yondau lutanu na luvali. Kaha ntsitu yeni ya kangukile!

Namane ua viukilile cikuma. Kaha ua hilukila kuli Elisa na ku ka mu leka ngueni: ‘Vuovuno nja tantekeya ngecize Njambi ua mu Isaleli ikeye lika Njambi ua vusunga ha mavu ose. Sukulukambu tambula vuana vuange’. Vunoni Elisa ua mu kumbuluile ngueni: ‘Houe ka citava nji vu tambule’. Elisa na tantekeya ngueni ci pua vuhenge nga a tambula vuana, muomu Yehova ikeye ua kanguisile vuvezi vua Namane. Vunoni ngamba ya Elisa, Ngehazi ua tondele vuana vuaco vu pue vueni.

Kaha Ngehazi ua lingile ngecize. Mua ile Namane, Ngehazi ua mu kavele, ua mu uana. Kaha ua mu leka ngueni: ‘Elisa na nji tumu ngueni u mu hieko vumo vuana linga a ka zumbule va vusamba vueni va na mu tulila vuovuno’. Ua handekele visaki. Vunoni Namane ka tantekeyele ngueni via puile visaki, ngeci ua tentuile vimo vikuata ua vi hele kuli Ngehazi.

Omo Ngehazi ua hilukile ku ndzivo, Elisa ua tantekeyele via lingile. Muomu Yehova ua mu lekele. Kaha Elisa ua lekele Ngehazi ngueni: ‘Muomu u na lingi evi viuma via vipi, mbumba ya Namane ika hiluka kuli ove’. Kaha mbumba ya mu kuatele ha ntsimbu ize vene!

Vika tu hasa ku lilongesaho? Ca ku livanga, tu na pande ku handeka via Yehova ngeci mua uze muana mpuevo. Ce ku kuasa. Ca mu civali, ka tua pandele ku lihalesa, ngue mua lingile Namane ha katete, tu na pande ku ononoka kuli vangamba va Yehova. Ca mu citatu, ka tua pandele ku handeka visaki ngeci mua lingile Ngehazi. Tu hasa ku lilongesa via vingi mu ku tanda Mbimbiliya, ni vati?