VANTU va ku tuvakana 50.000 vendele vungendzi vua ku tuhuka ku Mbambilone na ku ya ku Yelusalema. Vunoni omo va ka hetele va ka uanene Yelusalema ya himpuka ngundu. Uahi ua tungileho. VaIsaleli va na pande ku tungulula viose.

Cuma ca ku livanga ci va lingile ku tunga mutula. Eci ca pua cihela ha va kele na ku hanena vikombelo kuli Yehova. Kaha mu nima ya vingonde via vindende vaIsaleli va putukile ku tunga tembele. Vunoni vitozi viavo va va lihata navo ka va tondele linga va i tunge. Kaha ngeci va kele na ku va vuisa vuoma linga va likele. Kaha vitozi viavo va songangeyele muangana ua Pelesia linga a tumbike lisiko lia ku va vindika ku tunga.

Mua hitile miaka ya ingi. Mu nima ya miaka 17, fume ha va patukilile vaIsaleli mu Mbambilone. Yehova ua tuma vapolofeto veni Hangai na Zakaliya linga va leke vantu va putuke naua ku tungulula. Ngeci vantu va kulahelele muli Njambi kaha vononoka ku vapolofeto. Kaha va putukile naua ku tunga vutuhu lisiko lia vindikile ku tunga.

Kaha nguvulu ua Pelesia, lizina lieni Tatenayi, uezile na ku va hula iya ua va hele mpoko ya ku tungulula tembele. Ngeci vaIsaleli va mu lekele nguavo mu va kele mu Mbambilone, Muangana Silu ua va tumine ngueni: ‘Hamenu, vuovuno, ku Yelusalema mu ka tungulule tembele ya Yehova Njambi yenu’.

Kaha Tatenayi ua tuma mukanda ku Mbambilone mu ku hula nga cili matembua Silu ua hele mpundu lisiko liaco ni kuahi. Ngeci muangana ua Pelesia ua tumine mukanda. Mu mukanda uaco va sonekelemo nguavo cili Silu uavi handekele. Kaha ua sonekele ngueni: ‘Ecelenu vaIsaleli va tungulule tembele ya Njambi yavo. Kaha una pande ku va kuasa. Kaha mua hitile miaka iuana na tembele ya huile ku itunga vaIsaleli va kele na ndzolela’.

Mua hitile miaka ya ingi. Kaha munina ya miaka 48 fume ha ku hua ca tembele. Vantu va kele mu Yelusalema va kovelele mu vuhutu ngeci mbonge na tembele ya Njambi via putukile ku pihia. Vunoni ku Mbambilone umo kaIsaleli Ezela omo ua tantekeyele ngecize tembele ya Njambi ya pandele ku i viukisa. Ua tantekeya vika ua lingile?

Ezela ua ile mu ka mona Aletazeleze muangana ua Pelesia, kaha ou muangana ua cili, ua hele Ezela vuana vua vuingi ngeci ua tualele ku Yelusalema. Ezela ua laniene vaIsaleli va kele mu Mbambilone linga va mu kuase ku tuala vuana ku Yelusalema. Ngeci kua litavelele vantu va ku pua 6.000. Va ambatele palata na olu na vuana vueka na vueka.

Vunoni Ezela ua lisosomuene cikuma muomu mu njila mua kele vusonde vua vezi. Ngueni halumo va hasa ku vanieka palata na olu na ku va tsiha. Kaha Ezela ua kunguluile vantu vose ngue mu u na mono ha fikula. Kaha va vundilile kuli Yehova linga ava niunge mu vungendzi vuavo mu va ya ku Yelusalema.

Kaha Yehova ua va niungile mu vungendzi. Kaha mu nima ya vingonde vi uana via vungendzi va ka hetele mua cili ku Yelusalema. Eci citu muesa ngecize Yehova ue ku niunga vaze va kulahela muli ikeye ni vati?