VIKA vili na ku lingika aha? Ava vantu va li mu cilika ca kama. Muangana ua Mbambilone na lania likulukazi lia vantu va seho. Va li na ku pangesa vi ngandza via olu na malonga a palata ava nonene mu tembele ya Yehova ku Yelusalema. Vunoni omo va tungumukile, va muene munie ua muntu u soneka ha civumbe. Kaha vose va vuile vuoma vua kama.

Mbelesazale mutekulu ua Nevukaneza, ikeye honi a li ha vuangana. Ngeci ua sanene vamala veni va mana. Kaha ua handekele ngueni: ‘Uose a hasa ku nji tandela evi na ku nji lomboluelavio aka tambula vuana vua vuingi na ku pua ua mu citatu mu vuangana’. Vunoni na umo uavo na hasa ku tanda na ku lombolola visoneka vi na kala ha civumbe.

Kaha omo naye ya muangana ua vuile muyoyo mu hondo ya ku li la. Ua ka leka muangana ngueni: ‘Sukulukambu kati u ivue vuoma. Kua kala umo yala muno mu vuangana vuove a tantekeya vanjambi va ku lela. Kukuove Nevukaneza mua kele ha vuangana, ua mu puisile mukuluntu ua vamala vose va mana. Lizina lieni Ndaniele. Tuma vantu linga va ka mu sane kaha aku ku lomboluele viuma viose evi’.

Kaha va ka hiangele Ndaniele vuasi-vuasi. Mu nima ya ku viana vuana vuose vu va tondele ku mu fueta, Ndaniele ua putuka ku lombolola via lingisile Yehova a fumise kuku ya Mbelesazale, Nevukaneza ha vuangana. Ndaniele ua mulekele ngueni: ‘Muomu ua puile ua ku lihalesa cikuma ngeci Yehova na mu hele kasitiku.’

Kaha Ndaniele ngueni: ‘Vunoni ove Mbelesazale, vutuhu ua tantekeya viuma viose via solokelele Nevukaneza, kasi ue ku lihalesa ngeci mueni. U na neha vingandza na malonga via mu tembele ya Yehova kaha muli na ku nuinamo. U na lemesa vanjambi va ku songa ha miti na mavue, kaha ka ua lemesele Sakatanga uetu. Ngeci mukemuo Njambi na tumu livoko ku soneka aa mezi.

Ndaniele ua lombolola ngueni: ‘Evi vikevio vi va na sonekaho MENE, MENE, TEKEL na UPHARSIN.’

‘MENE ya lomboloka ngecize Njambi na tanda matangua a vuangana vuove kaha na vu huisa. TEKEL ya lombolola va na ku peselesa ha cipeseleso vunoni ka uesi na seho. UPHARSIN ya lomboloka vuangana vuove va na vu hie ku vaMende na vaPelesia’.

Ndaniele na ku tula lizi kanda, vaMende na vaPelesia va putuka ku takala Mbambilone. Va tambuile mbonge na ku tsiha Mbelesazale. Mezi a ha civumbe a lipuisilemo ku vutsiki vuze vene! Vunoni vika via solokelele vaIsaleli? Vuovuno tu ka vi tantekeya, vunoni tu ci tale vika via solokelele Ndaniele.