TALA vipanga vi vali na ku fuitangana aha. vaIsaleli va li mu ku tunga vivumbe via Yelusalema. Mua hiti miaka 152 fume hezilile Muangana Nevukaneza mu ku nongesa Yelusalema, ua lundumuine vivumbe na mapito. VaIsaleli ka va tungile naua vivumbe omo va hilukile ku fuma ku Mbambilone.

Vati vantu vakele na ku ivua mu va tungile mu mbonge ya ku hona vivumbe? Va vuile vuoma. Muomu vitozi vavo nga va hasele kuiza vuasi na ku va takala. Vunoni ou yala Nehemiya a li na ku kuasa vantu ku tungulula vivumbe. Ua tantekeya iya Nehemiya?

Nehemiya ua pua kaIsaleli ua ku mbonge ya Susane kuze kua kala va Molendekayi na Estele. Nehemiya ue ku pangela mu nganda ya muangana, halumo ua puile kavusamba ua cili ua Molendekayi na Lisano Estele. Vunoni Mbimbiliya ka ya handekele nga Nehemiya ua pangelele Muangana Ahasuelu, yala lia Estele. Ikeye ua pangelele Muangana ua hateleko Aletazeleze.

Vuluka nguove, Aletazeleze ua pua muangana ua cili uze ua hele vimbongo via vingi kuli Ezela, linga a hiluke ku Yelusalema na ku ka tungulula tembele ya Yehova. Vunoni Ezela ka tunguluile vivumbe via ku lundumuka via mbonge. Tu tale vati Nehemiya ua hasele ku ka linga cipanga caco.

Mua hiti miaka 13, fume ha hele Aletazeleze vimbongo kuli Ezela via ku ka tungulula tembele. Nehemiya ua puile mukua ku makela mu ngandza ya Muangana Aletazeleze. Eci ca lomboloka ngecize ikeye ua kele na ku hana viniu kuli muangana, ku tina kati va mu tovele vusungu. Ca puile cipanga ca seho ya kama cikuma.

Tangua limo, Hanani muanaye ya Nehemiya na vakuavo vamala va ku cifuti ca Isaleli vezile mu ku meneka Nehemiya. Va lekele Nehemiya, visoti viose vi va li na kuli uana navio vaIsaleli, kaha nguavo vivumbe via Yelusalema kasi via ku lundumuka. Aa mezi a vuisile Nehemiya vusiua vua kama kaha ua vundila kuli Yehova ha visoti viaco.

Tangua limo, muangana ua muene ngecize Nehemiya ua kele mu vusiua kaha ua mu hulile ngueni: ‘Vika vi na ku kokela vusiua? Nehemiya ua mu leka ngueni muomu Yelusalema i na pihia cikuma kaha vivumbe viayo kasi via lundumukila. Kaha muangana ua mu hulile naua ngueni: ‘Omuo honi vika u tonda?’

Kaha Nehemiya ua mu kumbuluile ngueni: ‘Nji tave nji ye ku Yelusalema, linga nji ka tungulule vivumbe’. Aletazeleze ua puile Muangana ua cili, ngeci ua tavesele Nehemiya a ye, kaha naua ua mu kuasele ku uana mavaya linga a ka pangese mu ku tunga. Mua ka hetele ku Yelusalema, Nehemiya ua lekele vantu via vutumbe vueni. Kaha vantu va tavele vutumbe vuaco na ku handeka nguavo: ‘Tu putukenu ku tunga’.

Omo vitozi vavo va muene vivumbe vili na ku londa va handekele nguavo: ‘ Tu yenu tu ka va tsihe linga va likele ku tunga’. Vunoni Nehemiya mua vi vuile ua hele mikuale na makunga kuli vakua ku panga. Kaha ua va lekele ngueni: ‘Kati mu ivue vuoma vua vitozi vetu. Luilenu vamuanoko, luilenu vana venu, luilenu vampuevo venu na vindzivo vienu’.

Vantu va na lisimpitika. Va na viukisa laza vitua viavo vutsiki na mutana oku va tualelelaho ku tunga. Mu nima ya matangua 52 vivumbe via huile ku vi tunga. Kaha vantu va huimine mitima muomu mbonge ili honi mu kati ka vivumbe. Nehemiya na Ezela va li na ku longesa vantu masiko a Njambi, kaha vantu va na viukilila cikuma.

Vunoni viuma ka viesi ngue muze mua laza tele kanda vaIsaleli va ci ye mu vundungo ku Mbambilone. Vantu va li na ku va sika kuli muangana ua Pelesia kaha va na pande ku mu pangela. Vunoni Yehova ua va kulahesele ngueni tangua a ka va tuma muangana ueka, kaha muangana uaco a ka neha ciyulo ku vantu. Iya muangana uaco? Vati a ka neha ciyulo ha mavu? Mua hitile miaka 450, ntsimbu na umo uahi a ci vi tantekeye. Kaha kua semukile umo muana ua seho ya kama cikuma. Vunoni ou u na pu muzimbu ueka.