OU MPUEVO ua ku vuaha ngeci ikeye Maliya. Ua puile kaIsaleli ua mu mbonge ya Nazaleta. Njambi a tantekeya ngueni Maliya ua puile muntu ua cili. Ngeci mukemuo ua tumine kangelo Ngambiele ku ka handeka neni. Ua tantekeya vika Ngambiele uezile mu ku leka Maliya ni? Tu ci mone.

Ngambiele ua mu menekele ngueni: ‘Hinduka, ove ua ku vezika cikuma, Yehova ali nove’. Maliya kanda aci moneho muntu uaco. Kaha Maliya ua zuzukile cikuma muomu ka ca mu lombolokele. Vunoni Ngambiele ua mu simpisile.

Ua mu lekele ngueni: ‘Kati u ivue vuoma Maliya. U na uana kavumbi kuli Yehova kaha aka ku lingila cuma ca cili. Vuovuno u kemita kakeke. Kaha u ka mu luka lizina lieni Yesu’.

Ngambiele ua tualeleleho ku handeka ngueni: ‘Ou kanike aka pua ua kama kaha va ka mu luka Muana Njambi, Mukua ku Hiana Viose. Yehova a ka mu puisa muangana ngue mua puisile Ndaviti. Vunoni Yesu a ka pua muangana ku miaka yose na vuangana vueni ka vu ka lenga!’

Kaha Maliya ua mu hulile ngueni: ‘Eci ci ka fua vati? Muomu yange ka nja sombokele, kaha kanda nji kale na yala, vati nji ka hasa ku kala na kakeke?’

Ngambiele ua mu lekele ngueni: ‘Ngolo ya Njambi i keza hali ove. Kaha muana va ka mu sana nguavo Muana Njambi’. Kaha ua mu lekele naua ngueni: ‘Vuluka ka vusoko kove Elizambeta. Vantu va handekele nguavo na kolo cikuma ka hasa naua ku sema. Vunoni vuovuno aka kuata muana ua yala. Tantekeya ngecize ka kua kele na vimo viahi via honoua ku linga Njambi’.

Kaha haze vene, Maliya ua handekele ngueni: ‘Ange nji ngamba ya Yehova! Vi lingiue kuli ange ngue mu u na handeka’. Ngeci kangelo ua ile.

Kaha Maliya ua ile vuasi-vuasi mu ku meneka Elizambeta. Omo Elizambeta ua vuile lizi lia Maliya kaha kakeke ua tumbukile na ndzolela muzimo. Kaha Elizambeta ua sulile na sipilitu ya Njambi, ua lekele Maliya ngueni: ‘Yove ua vezika cikuma ha kati ka vampuevo vose’. Kaha Maliya ua ka kele na Elizambeta vingonde vitatu, ngeci ua hilukile kuimbo ku Nazaleta.

Vuovuno Maliya a somboka kuli umo yala, lizina lieni Yosefe. Vunoni omo Yosefe ua tantekeyele ngueni Maliya a ka kuata kakeke, ka tondele naua ku mu ambata. Kaha kangelo ua Njambi ua mu lekele ngueni: ‘Kati u ivue vuoma vua ku ambata Maliya. Muomu Njambi ikeye na mu hana muana’. Ngeci Maliya na Yosefe va liambatele. Kaha va kele na ku vandamena ku semuka ca Yesu.