YESU ua tulile ha lisima lia ku Samaliya mu ku huima. Vandongesi veni va ile mu ku landa via-ku-lia mu mbonge. Ou mpuevo a li na ku handeka na Yesu, uezile mu ku sua mema. Kaha Yesu ua mu lekele ngueni: ‘Nji hieko mema’.

Ngeci ou mpuevo ca mu tangele cikuma. Ua tantekeya omo lia vika? Muomu Yesu ua puile kaYundeya kaha uze mpuevo ua puile kaSamaliya. Cingi ca vaYundeya ka va lilemene na vakua Samaliya. Ka va kele na ku lihandekesa! Vunoni Yesu ua lemene vantu va vifua viose. Kaha ngeci ua handekele ngueni: ‘Nga ua tantekeyele iya a li na ku ku vundila mema, nga u na mu vundila linga a ku hie mema a muono’.

Kaha mpuevo ngueni: ‘Muangana lisima lia lova cikuma kaha ka uesi na cienjo. Kuli u hasa ku uana mema a muono?’

Kaha Yesu ua mu lomboluelele ngueni: ‘Nga u ka nua ku mema aco ka u kevua naua mpuila. Vunoni mema a nje ku hana eku lingisa muntu ku yoya miaka yose’.

Kaha mpuevo ngueni: ‘Muangana, nji hieko mema aco! Linga kati nji kevue naua mpuila. Linga kati nji ize ize naua kuno mu ku sua mema’.

Uze mpuevo ua singaniekele ngueni Yesu ua kele na ku handeka via mema mpundu. Nkuma ua kele na ku handeka via vusunga vua ku tantekeya Njambi na vuangana vueni. Ovu vusunga vua pua ngue mema a muono. Vu hasa ku hana muono ka ue ku hua ua ya-ye ku muntu.

Ngeci Yesu ua lekele uze mpuevo ngueni: ‘Ya u ka sane yaliove kaha u keze kuno’.

Ua mu kumbulula ngueni: ‘Ka nja kele na yala’.

Kaha Yesu Ngueni: ‘U na handeka mua cili. Muomu ua kele na vamala vatanu, vunoni yala i u li neni vuovuno kati yaliove’.

Uze mpuevo ua likomokelele cikuma muomu viose via handekele Yesu via vusunga. Vati Yesu ua tantekeyele viuma viose evi? Muomu Yesu ikeye uze U va Kulahesele, uze ua tumine Njambi, kaha Njambi Ikeye ue kele na ku mu hana mizimbu yose. Kaha ha ola ize vandongesi va hilukile, kaha va komokele ku mu uana ali na ku handeka na mpuevo ua kaSamaliya.

Vika tu hasa ku lilongesa ha muzimbu ou? Tu lilongesa ngecize Yesu ua lemene vantu va ku miyati yose. Netu tua pande ku fua ngeci mueni. Ka tua pandele ku singanieka nguetu vantu vamo va vapi muomu vakua muyati ueka. Yesu ua tonda ngueni, vantu vose, va tantekeye vusunga vuze vu tuala ku muono ka ue ku hua. Netu tua pande ku kuasa vantu linga va lilongese vusunga.