OU KAKEKE u mu tantekeya, ni? Ikeye Yesu. Vuovuno na semuka mu mulaka. Mulaka ua pua cihela ci ve ku niungila vimuna. Maliya na langeka kakeke Yesu, mu cikasa ci ve ku lila vimulu na vimuna vakuavo. Vika va Yosefe na Maliya vezilile oku ku mulaka? Eci ca pua cihela ca ku sulumuina tukeke ni?

Houe. Vi na va neha kuno evi: Muangana ua Loma, Sezale Angustu, ua tumbikile lisiko ngueni muntu uose na pande ku hiluka ku mbonge ya semukila linga a ka lisonekese mu livulu. Ngeci Yosefe uezile ku Mbetelema muomu kukekuo kua semukilile. Vunoni omo Maliya na Yosefe va ku hetele ka va uanene hondo ya ku tulila. Ngeci mukemuo vezile oku ku mulaka ua vimuna. Kaha mu litangua lize vene Maliya ua sulumuine kakeke Yesu! Vunoni ngue mu u na mono aha, kakeke a li mua cili.

Ua mono ava tuniungi va neza mu ku mona Yesu ni? Mu va kele ku musenge vutsiki mu ku niunga vampanga vavo, ceke ca va tuilile. Va muene kangelo! Tuniungi va tungumukile cikuma kaha va vuile vuoma. Vunoni kangelo ngueni: ‘Kati mu ivue vuoma! Nji na mi nehela muzimbu ua cili. Lelo mu Mbetelema mua semuka Kilistu Muangana. Muovole ua vantu! Mu ka mu uana va na mu vungila ha vintanga kaha na kosa mu cikasa ci ve ku lila vimuna’. Kaha haze vene tungelo va vengi vezile kaha putukile ku sangaziala Njambi. Ngeci tuniungi va ile vuasi-vuasi mu ku ka tonda Yesu, vuovuno honi va na mu uana.

Ua tantekeya omo lia vika Yesu ua pua muntu ua seho ya kama cikuma ni? U mu tantekeya mpundu? Vuluka nguove, mu muzimbu ua katete ua livulu lino tua handekele via Muana ua katete ua Njambi. Uze Muana ua pangele hamo na Yehova mu ku tanga melu na mavu na viuma viose. Ikeye Yesu!

Yehova ua nunguluile muono ua Muaneni ku fuma muilu na ku u haka mu lizimo lia Maliya. Haze vene kakeke ua putukile ku kola mu lizimo lia Maliya ngue mu ve ku kola vana vose mu mazimo a vanayavo. Vunoni ou kakeke ua puile Muana Njambi. Kaha Yesu ua semukilile mu mulaka, ku Mbetelema. Ca ku lomboloka honi omo lia vika tungelo va viukilile cikuma mu ku zimbuila vantu nguavo Yesu na semuka, ni?