TALA Yesu na kuata kanike ua yala. U hasa ku mona nguove Yesu ua lemene vanike. Ava vamala va na mu tala va pua vandongesi veni. Vuno Yesu a li na ku va leka vika? Tu ci vi tantekeye.

Yesu na vapostolo veni mu va ci hete ku fuma mu vungendzi vua laha. Mu va kele mu njila vapostolo va kele na ku linga vimpata ha kati kavo. Kaha mu va ka hetele Yesu ua va hulile ngueni: ‘Vika mu na kala na ku lisompa mu njila?’ Yesu ua tantekeyele vimpata via kele ha kati kavo. Vunoni ua va hulile lika linga a mone nga vapostolo va hasa ku mu leka.

Vapostolo ka va hasele ku mu kumbulula muomu mu tapalo va kele na ku linga vimpata via ku mona iya ua kama ha kati kavo. Vamo vapostolo va tondele ku limuesa nguavo vakevo va seho ku tuvakana vakuavo. Vati Yesu ua hasele ku va lomboluela ngueni ka ca puile ca cili ku lihaka ku vukama?

Kaha ua sanene umo kanike ua mundende na ku mu imika ha kati kavo vose. Kaha ua lekele vandongesi veni ngueni: ‘Nji tonda mu tantekeye nguenu nga ka mu aluluka na ku lipuisa ngue vanike, ka mu ka hasa ku kovela mu vuangana vua Njambi. Muntu ua kama mu vuangana vua Njambi na pande ku pua ngeci mua ou kanike.’ Ua tantekeya omo lia vika Yesu na handekela ngecize?

Muomu vanike va vandende ka ve ku tonda ku limuesa ngue va seho ya kama ku hiana vakuavo. Ngeci vapostolo navo va na pande ku lilongesa ku pua ngue vanike na ku likela ku limuesa ngue va seho ku hiana vakuavo.

Kaha kuli ntsimbu ikuavo naua omo Yesu ua muesele ngozi ku vanike. Mu nima ya vingonde via vindende lika, vantu va nehele vanike va vandende linga va ku mone Yesu. Vapostolo va tondele ku va sekula. Vunoni Yesu ua lekele vapostolo veni ngueni: ‘Ecelenu vanike veze kuli ange kati mu va vindike muomu vuangana vua Njambi vua pande vantu ngeci muavo’. Kaha Yesu ua tambuile vanike na ku va vezikisa. Ca cili ku tantekeya ngecize Yesu ua lemene vanike va vandende, ni vati?