YESU na niengua cikuma, ni vati? Ua tantekeya vika na nienguela ngecize ni? Muomu ava vamala va u li na ku mona mu tembele ya Njambi ku Yelusalema va pua vakua lizangamena. Ve ku nganiala zimbongo zia zingi ku vantu vaze ve kuiza ku tembele mu ku lemesa Njambi.

Ua mono vaze vangombe na vampanga na mavembe? Ava vamala ve ku landesela vimuna viavo oku vene ku tembele. Ua tantekeya omo lia vika? Muomu vaIsaleli ve ku tonda tusitu na tuzila linga va vi kombeleye kuli Njambi.

Lisiko lia Njambi lia handekele ngecize nga umo kaIsaleli na vulumuna na pande ku hana cikombelo kuli Njambi. Kaha kua kele ntsimbu imo, vaIsaleli va kele na ku hana vikombelo. Kaha kuli ve ku uanene tuzila na tusitu linga va hane kuli Njambi?

VaIsaleli vamo va fukile vimuna na tuzila. Ngeci va hasele ku kombeleya. Vunoni cingi ca vaIsaleli ka va kele na tusitu na tuzila. Kaha vamo tele ku membo avo ku laako cikuma na Yelusalema, ngeci ka va hasele ku neha vimuna ku tembele. Kaha vantu va kele na ku-iza mavokovoko na ku landela kuze vene tusitu na tuzila va va tondele. Vunoni ava vamala va kele na ku landesa ha ndando ya kama cikuma. Va kele na ku zangamena vantu. Tele ka va pandele ku landesela omu mu tembele ya Njambi.

Evi vikevio via nienguesele Yesu. Ngeci ua putukile ku fulumika vimesa viavo na ku sanduola zimbongo ziavo. Kaha uosele cikote ca mikole ua putukile ku tuhula tusitu vose mu tembele. Kaha ua lekele vamala va kele na ku landesa mavembe ngueni: ‘Va fumisenu muno! Likelenu ku tenga ndzivo ya Tata cihela ca ku lingila mingoso.’

Vamo vandongesi veni va kele neni oku ku tembele mu Yelusalema. Va komokele mu ku mona via kele na ku linga Yesu. Kaha va vulukile ha va soneka via muana Njambi, mu Mbimbiliya, nguavo: ‘Cilemo ca ndzivo ya Njambi ci ka suama mu li ange ngue tuhia’.

Omo Yesu ua kele mu Yelusalema ku cilika ca Pasovala, ua lingile vikomoueso. Kaha mu nima ya ntsimbu, ua fumine ku Yundeya ua hilukile ku Ngalileya. Vunoni mu vungendzi vueni ua hitile ku muhato ua Samaliya. Tu ci mone vika vi ka solokako.

Yoano 2:13-25; 4:3, 4.