MU NIMA ya ku suluka ku ndzivo mu hondo ya kuilu, Yesu ua ile na vapostolo veni ku citungu ca Ngetesemane. Va kele na ku ya ku citungu eci vintsimbu via ku nima. Vuovuno Yesu na leka vandongesi veni ngueni va na pande ku vingila na ku vundila. Kaha ua va sile kamo ka ntunda kaha ua tsikamene ha mavu na ku vundila.

Kaha mu nima ya ntsimbu, Yesu ua hilukile ha va kele vapostolo. Mu ku singanieka cove, Yesu ua uanene vapostolo tele va li na ku linga vika? Tele va na kosa! Yesu ua va lekele lutatu luose ngueni va pandele ku vingila, vunoni ntsimbu yose mua hilukile ua va uanene va na kosa. Yesu omo ua hilukile lua ku manuisila ua handeka ngueni: ‘Vati mu na kosa ku ntsimbu ino ya cifua eci? Ntsimbu i na heta linga va nji hane ku vitozi viange.’

Kaha ha ntsimbu ize vene va vuile muyoyo ua civunga ca kama. Vamala va kele na ku iza na mikuale na zimbueti! Va ambatele mitetengo linga va hase ku mona. Kaha omo va suenene mu hiehi, umo ua ku civunga ua ile mpundu kuli Yesu. Kaha ua mu tsuembele, ngue mu u li na ku mona aha. Yala uaco ikeye Yundasa Iskaliota! Vika ua tsuembelele Yesu?

Ngeci Yesu ua mu hulile ngueni: ‘Yundasa, u nji enda vungungu mu ku nji tsuemba ni?’ Cili, ku tsuemba ca puile citantekeyeso. Ca lekesele naco Yundasa ku vitozi ngueni uze ua tsuembele ikeye Yesu u va kele na ku tonda. Kaha vitozi veni va mu kuatele. Vunoni Petulu ka tavele va kuate Yesu ca ku hona luozi. Kaha ua somuene mukuale uendele nauo, kaha ua vetele umo Yala ua kele mu hiehi neni. Vunoni mukuale ua sevukile mu mutue ua ka hitula lituitui lia ku cilio. Kaha Yesu ua kuatele ku lituitui lia uze yala ua li kanguisile.

Yesu ua lekele Petulu ngueni: ‘Hiluisila mukuale uove mu cindalu cauo, ka ua tantekeyele nguove nji hasa ku vundila kuli Tata linga a tume makulukazi a tungelo linga va ku nji ovole, ni? Cili vene, a hasa! Vunoni Yesu ka vundilile kuli Njambi linga a tume tungelo muomu ua tantekeyele ngueni ntsimbu yeni i na heta linga vitozi veni va mu kuate. Ngeci ua vecelele linga va mu tuale. Tu ci mone vika via solokelele Yesu ku fuma haze..