KAHA omo Yesu ua kele na kuenda mangendzi ua kele na ku kanguisa vavezi. Ngeci muzimbu ua vikomoueso via kele na ku linga ua ka hetele ku membo na vimbonge vikuavo. Ngeci va kele na ku mu nehela vakua ku vendukuta, tupuputa, tuveveve na vilema na veka vavengi va kele na mavezi. Kaha Yesu ua va kanguisile vose.

Mua hiti honi miaka itatu fume ha va mbatizila Yesu kuli Yoano. Kaha Yesu ntsimbu imo ua lekele vapostolo veni ngueni vuovuno a ka ya ku Yelusalema ku va ka mu tsihila na ku sanguka ku vatsi. Vunoni mu ntsimbu ize Yesu ua ci kele na ku kanguisa.

Tangua limo Yesu ua kele na ku longesa lia Sapalalo. Sapalalo lia puile litangua li va kele na ku huima vaYundeya. Ou mpuevo i u li na ku mona aha ua kele na ku vavala cikuma. Ua kele na muongo ua ku henga miaka 18, ka hasele kuoloka. Kaha Yesu ua mu salekele livoko ngeci ua hasele kuoloka. Ua kangukile!

Eci ca lingisile vakuluntu va vulombelo ku niengua. Umo uavo ua tambekele ngueni: ‘Kua kala matangua atanu na limo a tua pande ku panga, akeo matangua a mu hasa kuiza linga va ku mi kanguise, kati lia Sapalalo!’

Kaha Yesu ua handekele ngueni: ‘Enu vamala va ku pihia. Muntu uose ha kati kenu ue ku zitula cimulu ceni, na ku mu tuala ha lisima linga a ka nue mema ha litangua lia Sapalalo. Nkuma ka citava ku kanguisa ou mpuevo ua vavala miaka 18, muomu litangua lia Sapalalo ni? Cikumbulula ca Yesu ca sahuile vaze vamala va vapi.

Kaha Yesu na vapostolo veni va katukile vungendzi vua kuya ku Yelusalema. Mu va sondolokele kamandende mbonge ya Yeliko, tupuputa vavali vakua ku vundila vukuasi, va vuile nguavo Yesu a li na ku hita. Ngeci va tambekele nguavo: ‘Yesu, tu kuase!

Kaha Yesu ua kumbuluile vaze tupuputa ngueni: ‘Mu tonda nji mi lingile vika?’ Kaha vakevo nguavo: ‘Muangana imuisa meso etu’. Yesu ua kuatele ha meso avo kaha haze vene va putukile ku mona! Ua tantekeya vika Yesu ua lingilile vikomoueso viose evi, ni? Muomu ua lemene vantu kaha ua tondele linga va mu tsiliele. Ngeci mukemuo, tu hasa ku kala na vusunga nguetu mua ka pua Muangana na umo uahi a ka vavala naua.