LIA puile lia Ciuana, tele mu na hiti matangua avali. Yesu na vandongesi veni 12 vezile ku hondo ya kama ya kuilu linga va ku lie Pasovala. Uze yala a li na ku tuhuka ikeye Yundasa Iskaliota. A li na kuya kuli vasasendote linga a ka va leke vati va hasa ku kuata Yesu.

Tele mua hiti litangua limo, Yundasa ua ile na ku va hula ngueni: ‘Vika mu ka nji hana nga nji mi kuasa ku kuata Yesu?’ Kaha va mu lekele nguavo: ‘Makumi atatu a zimbongo zia palata’. Ngecize Yundasa a li na ku ya mu ku ka liuana na vaze vamala linga aka va tuale kua li Yesu. Ua lingile vupi vua kama, ni vati?

Ngecize Pasovala inahu. Vunoni Yesu ua putukile naua cilika ca seho ya kama. Kaha ua hele ku vapostolo veni vimbaluvuila via mbolo ua handekele ngueni: ‘Lienu muomu eyi ya lomboloka muvila uange u va ka hana enu.’ Kaha ua va hele naua ngandza ya viniu ngeci ua handekele ngueni: ‘Nuenu muomu eyi i na lomboloka maninga ange a va ka muaniena enu.’ Eci cilika mu Mbimbiliya va ci luka nguavo ‘mulalelo ua Muangana’ ni nguetu ‘ku-lia ca cinguezi ca Muangana.’

VaIsaleli va kele na ku lia Pasovala linga va vuluke muze kangelo ka Njambi ‘ua hitile’ helu lia vindzivo viavo ku Ingito, vunoni ua tsihile vana va ntuantua vose mu vindzivo via vakua Ingito. Vunoni hano Yesu a tonda ngueni vandongesi veni va pue na ku vuluka vati ua hele muono ueni kuli vakevo. Ngeci mukemuo a li na ku va leka ngueni va pue na ku linga cize cilika ca seho cikuma lumo mu muaka.

Mu nima ya ku lia Mulalelo ua Muangana, Yesu u a lekele vapostolo veni ngueni va na pande ku kaniama mu lutsilielo. Mu ku sulumuina va putukile ku imbila Njambi miaso kaha va ile. Tele kua toko cikuma mu kati ka vutsiki. Tu ci tale kuze ku va ile.