OU MUANA mpuevo i u na mono aha a li na miaka 12. Yesu na mu kuata ku livoko kaha ava va na mana ku mukulo vakevo va naye na ise. Ua tantekeya vika va na viukilila ngeci ni? Tu ci vi tantekeye.

Ise you muana mpuevo, ua puile umo yala ua seho cikuma lizina lieni Njailu. Tangua limo, muaneni ua vavalele, kaha va mu langeka ha muhela. Vunoni ka kangukile. Kaha vuvezi vua mu konenekele cikuma. Njailu na mpueyeni va lisosomuene cikuma muomu va muene nguavo muanavo ua mpuevo a tsa. Ua puile muanavo umo lika. Ngeci Njailu ua ile mu ku tonda Yesu. Muomu ua vuile vikomoueso via kele na ku linga Yesu.

Kaha Njailu ua ka uanene Yesu ali mu kati ka civunga ca kama. Vunoni Njailu ua li cikinine mu mbunga noho ua ka tsikamene ku mikono ya Yesu. Ua mu lambelela ngueni: ‘Muanange ua mpuevo ali na ku vavala cikuma-kuma. Sukulukambu tuaya u ka mu kanguise’. Ngeci Yesu ua tavele ku ya neni.

Kaha omo va kele na ku ya, vantu va kele na ku lisindika linga va suene Yesu mu hiehi. Kaha Yesu ua manene. Ua hula ngueni: ‘Iya na nji kuata?’ Yesu ua vuile ngecize ngolo ya mu tepuluka ngeci ua tantekeyele ngueni kuli umo ua mu kuatele. Vunoni iya? Umo mpuevo ua vavalele cikuma miaka 12. Ikeye uezile na ku kuata ku vuzalo vua Yesu ngeci ua kangukile!

Eci ca simpisile cikuma Njailu, muomu ua muene ngecize ca puile ca casi kuli Yesu ku kanguisa muntu. Kaha kuezile kanganda na ku leka Njailu ngueni: ‘Kati u tangule Yesu muomu muanove na tsi laza’. Yesu ua vuileko ngeci ua lekele Njailu ngueni: ‘Kati ume mutima aka kala mua cili’.

Omo va ka hetele ku ndzivo ya Njailu va uanene vantu va li na ku lila cikuma. Vunoni Yesu ua handekele ngueni: ‘Kati mu lile. Kanike ka tsile. Ali mu tulo’. Kaha vantu va mu zolele na ku mu sembulula muomu va tantekeyele ngecize kanike na tsi.

Kaha Yesu ua kovelele hamo na ise na naye ya muana mpuevo kaha na vapostolo vatatu mu hondo ya kosele kanike. Yesu ua kuatele kanike ku livoko kaha ua handekele ngueni: ‘Hinduka!’ Kaha kanike ua sangukile ngue mu u li na ku mona aha. Kaha ua hindukile na ku putuka kuenda! Ngeci mukemuo ua mono va naye na ise va na viukilila cikuma-kuma.

Ou kati ikeye muntu ua katete ya sanguile Yesu ku vatsi. Ua katete ua sanguile Yesu u va soneka mu Mbimbiliya, ua puile muana ua umo ntuluue ua ku mbonge ya Naini. Kaha ku lutue lua ntsimbu Yesu ua sanguile naua Lazalu ndumbu ya Maliya na Mata. Omo Yesu aka sika mu vuangana vua Njambi aka sangula vantu va vengi va tsa. Tu na pande ku viukilila cikuma omo lievi, ni vati?