TANGUA limo, Yesu ua lekele umo yala ngueni na pande ku lema mukuavo. Kaha uze yala ua hulile Yesu ngueni: ‘Mukuetu ua pua iya?’ Yesu na tantekeya viuma via li na ku singanieka ou yala. Ue ku singanieka ngueni vakuavo vapua lika vakua muyati ueni ni vakua vulombelo vueni. Tu ci mone vika Yesu ua mu lekele.

Vintsimbu vimo, Yesu ua kele na ku longesa na visimo. Kaha ua telelele uze yala cisimo. Ua mu lekele via umo kaYundeya na umo kaSamaliya. Tua li longesa laza nguetu vaYundeya na vaSamaliya ka va lilemene. Vunoni cisimo ca tele Yesu eci:

Tangua limo, umo kaYundeya ua kele na ku sikuluka mu njila ya ha muncinda ya ya ku Yeliko. Kaha mihuza va mu mbutukilile. Va mu tambula zimbongo zieni na ku mu tingula va mu sile tele a lingila ku tsa.

Kaha mu nima ya ntsimbu, umo sasendote ua kaYundeya uezile mu tapalo. Ua muene uze yala uva tinguile ku mihuza. Mu ku singanieka cove vika ua lingile? Ua hitilile sinia lize lia tapalo na ku tualelelaho vungendzi vueni. Kaha kuezile yala mukuavo mukua ku lemesa Njambi. Ua puile kaLevi. Vuno ua manene ni? Houe, ka manene mu ku kuasa uze yala uva tinguile. Ua mu mono sasendote na kaLevi, va na hitila ku mukulo na ku tuvakana.

Ua mono ou yala a li na ku kuasa uze u va tinguile. Ua pua kaSamaliya. Vunoni a li na ku kuasa kaYundeya. Ali na ku mu haka vimo vihemba ha vimbandu. Kaha mu nima yaco, ua tambula ou kaYundeya na ku mu tuala ku cihela ca hasa ku huima mua cili na ku kanguka.

Kaha mua manene ku ta cisimo, Yesu ua lekele uze yala ua mu hulile, ngueni: ‘Iya ha kati ka vaze vatatu ua muesele ku pua mukuavo kuli uze yala uva tinguile? Uze sasendote ni uze kaLevi ni uze mukua Samaliya?’

Kaha yala ua mu kumbuluile ngueni: ‘Uze yala ua kaSamaliya. Muomu ua muesele ngozi kuli uze yala uva tinguile.’

Kaha Yesu ngueni: ‘Ua handeka mua cili, ya nove u ka linge ngue muze mua lingile ikeye.’

Nove ci na ku leme ku tantekeya mua kele na ku longesa Yesu, ni? Tu hasa ku lilongesa viuma via vingi cikuma nga tu halakana ku mezi a Yesu ava soneka mu Mbimbiliya, ni vati?