UA MONO ize ntangantanga ina temuna ivali na ku inika ava vamala ni? Mu va tuhukile mu Yelusalema kaha ntangantanga ya monekele. Ava vamala vali na ku fuminina ku Vucelo ve ku lilongesa via vi ntangantanga. Va na tsiliela nguavo eyi ntangantanga ya iha ili na ku va tuamenena kuli muntu ua seho ya kama.

Mu va ka hetele ku Yelusalema, va hulile nguavo: ‘Ali kulihi ouo kanike a ka pua muangana ua vaYundeya? “VaYundeya” lia pua lizina likuavo lia vaIsaleli. Vamala va handekele nguavo: ‘Tua muene ntangantanga ya kanike, tele tu ci li ku Vucelo ngeci tu neza mu ku mu lemesa’.

Omo Helonde, uze muangana ua kele ku Yelusalema, ua vi vuile ua nienguele. Muomu ka tondele muangana ueka a mu nieke cihela ceni. Ngeci Helonde ua sanene vakuluntu va vasasendote na ku va hula ngueni: ‘Kuli a ka semukila ouo muangana u va tu kulahesa?’ Va mu kumbuluile nguavo: ‘Mbimbiliya nguayo ku Mbetelema.’

Kaha Helonde ua sanene vaze vamala va ku Vucelo na ku va leka ngueni: ‘Hamenu mu ka tonde ku a li kanike. Nga mu ka mu uana, ku mua ku nji lekako. Muomu nange nji tonda ku ka mu lemesa’. Nkuma Helonde ua tondele mpundu ku ka uana kanike linga a mu tsihe!

Kaha ntangantanga ya tualelelaho ku va tuamenena ku Mbetelema, kaha ya manene ha cihela ha kele kanike. Omo vamala va kovelele mu ndzivo, va uanene Maliya na kanike Yesu. Va hele Yesu vuana vu va mu hitikile. Vunoni Yehova ua mamuine vaze vamala mu cilota, linga kati va hiluke kuli Helonde. Ngeci va hilukile ku cifuti cavo mu njila yeka.

Omo Helonde ua tantekeyele ngueni vamala va ku Vucelo va sevunukilile njila yeka, ua tenukile cikuma. Ngeci ua tumbikile lisiko lia ku tsiha vanike va vamala vose va mu Mbetelema fume ha kakeke ua miaka ivali na ku tuala kuintsi. Vunoni Yehova ua livangele ku lungula Yosefe mu cilota, kaha Yosefe ua tinine ku Ingito na vakua ndzivo yeni. Mu nima ya ntsimbu omo Yosefe ua vuile nguavo Helonde na tsi, ua ambatele Maliya na Yesu ua hiluka ku Nazaleta. Kukekuo kua ka kolelele Yesu.

Mu ku singanieka cove iya ua lingisile ize ntangantanga i tue ceke? Vuluka nguove, mu nima ya ku mona ntangantanga vaze vamala va ci ile ku Yelusalema. Satana Ndiavu ua tondele ku tsiha Muana Njambi, kaha ua tantekeyele ngueni Muangana Helonde ua ku Yelusalema amba a ka seteka ku tsiha kanike. Nkuma Satana ikeye ua lingisile ize ntangantanga i tue ceke.