TALA ou kanike ua yala a li na ku handeka na vakuluntu. Ava vamala vapua valongisi mu tembele ya Njambi mu Yelusalema. Kaha ou kanike ua yala a li ha kati kavo ikeye Yesu. Na koloko kamandende. Ali honi na miaka 12.

Vakuluntu va komokele cikuma muomu Yesu ua tantekeyele mua cili via Njambi na visoneka via mu Mbimbiliya. Omo lia vika Maliya na Yosefe ka vesi neni? Va li kulihi? Tu ci mone.

Muaka ku muaka, Yosefe ua kele na ku ya na vakua ndzivo yeni ku Yelusalema ku cilika ca seho ya kama, ci va luka nguavo Pasovala. Vua puile vungendzi vua laha cikuma ku fuma ku Nazaleta na ku Yelusalema. Ku ntsimbu ize ka kua kele makalu na kumboyo. Cingi ca vantu, va kele na kuenda vene ha mikono vungendzi vua matangua atatu linga va ka hete ku Yelusalema.

Yosefe ua kele honi na vana vavengi. Kua kele vamo vantsongo va Yesu va vamala na va vampuevo, va pandele ku niunga. Mu muaka uze, Yosefe na Maliya va kele naua mu vungendzi vua ku hiluka na vana vavo kuimbo ku Nazaleta. Vakevo va singaniekele nguavo Yesu a li na ku enda hamo na vakuavo mu mbunga. Vunoni mu va tulile, tele litangua li na lahuka, va tungumukile Yesu uahi. Ngeci va mu tondele ha kati ka va vusoko na va vusamba vunoni ka va mu uanene. Ngeci va hilukile ku Yelusalema mu ku mu tonda.

Amba vuose, va ku mu uanene ku tembele a li na valongisi. Ua kele na ku va halakana kaha na ku va hula. Vantu vose va komokele mana a kele nao Yesu. Vunoni Maliya ua mu lekele ngueni: ‘Muanange, vika u na tu lingila ngecize? Nange na Iso, tu nomu mitima mu ku ku tonda’.

Kaha Yesu ua va kumbuluile ngueni: ‘Vika mu na nji tondela? Ka mua tantekeyele ngecize ange nji na pande ku kala mu ndzivo ya Tata, ni?

Yesu ua lemene ku kala ku tembele muomu ua kele na ku lilongesako via Njambi. Netu tua pande ku ivua ngeci mueni, ni vati? Yesu mua hilukile ku Nazaleta, simano ku simano, ua kele na ku ya ku vikungulukilo mu ku lemesa. Omo lia ku halakana, Yesu ua lilongesele viuma via vingi mu Mbimbiliya. Tua pande ku pua ngeci mua Yesu na ku kava lungano lueni.