MU KU hita ca matangua, Yesu ua lisoluele lua luingi. Ntsimbu imo, ua lisoluele ku vandongesi va ku pua 500. Omo Yesu ua va solokelele ua tantekeya vika ua handekele navo ni? Via vuangana vua Njambi. Yehova ua tumine Yesu ha mavu linga a ku ambulule via Vuangana. Ngeci ua tualeleho ku linga ngecize ambe mua sangukile ku vatsi.

Kasi u ci vuluka vika vuangana vua Njambi ni? Vuangana vua pua mpundu nguvulu ya Njambi ya muilu, kaha Yesu ikeye ya hangula Njambi ku pua muangana. Ngeci mu tua lilongesa Yesu ua muesele ngecize a ka pua muangana ua cili mu ku lisa vakua ndzala, mu ku kanguisa mavezi na mu ku sangula vatsi.

Mavu a ka fua vati omo Yesu a ka pua muangana mu likulukazi lia miaka, muilu? Mavu ose va ka a puisa palandaizi ya cili. Ka mu ka kala naua vindzita, ni vukenia, ni mavezi cipue kutsa. Tua tantekeya nguetu ovu vua pua vusunga muomu Njambi ua tangele mavu linga a pue palandaizi, citungu ca cili ca ku yoyela vantu mu ndzolela. Vikevio via pangelele citungu ca Endene ha katete. Yesu a ka panga na ndzili yose linga vutumbe vua Njambi vu ka lipuisemo.

Vuovuno ntsimbu i na puho linga Yesu a hiluke muilu. Mu matangua 40 Yesu ua lisoluele kuli vandongesi veni. Ngeci va kele honi na vusunga nguavo Yesu na sanguka mpundu. Vunoni ntsimbu kanda a seze vandongesi veni ua va lekele ngueni: ‘Kalenu mu Yelusalema noho mu na tambula sipilitu santu’. Sipilitu santu ya pua ngolo ya Njambi, ngue luhundzi lua ku huhua. Ikeyo ye ku kuasele vandongesi ku linga cizango ca Njambi. Kaha mu ku manusula, Yesu ua va lekele ngueni: ‘Mua pande ku ambulula muzimbu uange na kua lenga mavu’.

Omo Yesu ua manusuile ku handeka viuma evi, cuma ca ku komouesa ca solokele. Ua putukile ku londa muilu, ngue mu u na mono aha. Kaha ua zimanganene mu liselua, ngeci vandongesi ka va hasele ku mu mona naua. Yesu ua ile muilu kaha ua putukile ku sika ha vandongesi veni oku a li muilu vene.