TALA ovu vuato vuli mu visoti! Vuli na ku pokozuoka mu vivalavala. Ua mono vantu va na tumbukila mu mema ni? Vamo va na hete laza ku ntunda. Paulu uze ni? Tu tantekeye vika via mu solokelele.

Vuluka nguove, Paulu ua kele miaka ivali mu kamenga ka ku Sesaliya. Kaha ikeye na vakuavo mapeleso va va hakele mu vuato vu ya ku Loma. Mu va hitile ku mukulo ua nkundu ya Keleta, kua nokele liniondzi lia kama. Kua kele luhundzi lua kama ngeci vantu ka va hasele ku sunga vuato. Kaha ka va muene litangua ku mutana ni vintangantanga ku vutsiki. Ka va kele naua na lulavelelo lua ku ovoka

Kaha Paulu ua katukile na ku handeka ngueni: ‘Ha kati kenu na umo uahi aka zimbalesa muono ueni; vuato lika vu ka nonga. Muomu vutsiki vua zau kangelo ua Njambi uezile na ku nji leka ngueni: “Paulu kati u ivue vuoma! Muomu u na pande ku ka mana ku meso a Sezale muangana ua Loma. Kaha Njambi a kovola vose va li nove mu vuato.”’

Ku vutsiki vua litangua lia vu 14, fume ha ya putukilile niondzi, vakua ku sunga vuato va muene nguavo mema a li naku tepuluka! Omo lia vuoma vua ku liveta mu mavue mu milima, va uisile manata a ku koleka vuato. Lia mukuavo va muene ku ntunda. Kaha va setekele ku sunga vuato na kuze ku museke ua ku mukulo.

Omo va hetele ku hiehi na ntunda, vuato vua lindundile mu mutumbo ua museke kaha va sakamenene. Kaha mancimba a putukile ku vu pokozuola mu vivalavala. Kaha mukuluntu ua civunga ua handekele ngueni: ‘Enu vose mu tantekeya ku tana, tumbukilenu mu mema linga mu ye ku ntunda. Enu vakuavo tumbukilenumo na ku likuatelela ku vivalavala via vuato’. Kaha va lingilemo. Kaha ngeci vantu vose 276 va kele mu vuato va ka hetele ku ntunda, ngue mua kulahesele uze kangelo.

Eyi ya pua nkundu i va luka nguavo Melita. Vantu va va uaneneko va kele na ngozi ya kama kaha va niungile vose vendelele mu vuato. Kaha omo kuilu kua cele, Paulu va mu hakele mu vuato vueka na ku mu tuala ku Loma.