OU MUKUENDZE u una mono aha na kapostolo Paulu ikeye Timoteo. Timoteo na vavusoko vueni va tunga mu Listala. Naye lizina lieni Yunisi kaha kukueni ua mpuevo ikeye Loisi.

Ovu vungendzi vua neza ngeci Paulu ku Listala vua mu citatu. Mua hiti honi muaka, fume ha vezilile Paulu na Mbanambasa, mu vungendzi vua ku livanga vua kuambulula. Vuovuno Paulu neza naua na kavusamba keni Silase.

Ua tantekeya vika Paulu ali na ku leka Timoteo, ni? Ua mu hulile ngueni: ‘U tonda ku lipandakana kuli yange na Silase, ni? Na vukuasi vuove, tu ka hasa ku ambuluila vantu va ku vihela via ku laako.’

Kaha Timoteo ua kumbuluile ngueni: ‘Eyo, nji tonda ku ya nenu.’ Kaha Timoteo ua sezele vavusoko vueni ua ya na Paulu na Silase. Vunoni ntsimbu kanda tu ci lilongese via vungendzi vuavo, tu ci tale vika via solokelele Paulu. Mua hiti miaka 17, fume ha mu solokelele Yesu mu njila ya ku Ndamasiku.

Vuluka nguove Paulu uezile ku Ndamasiku mu ku yandesa vandongesi va Yesu, vunoni vuovuno neni na pu ndongesi! Kaha vamo vitozi va tondele ku tsiha Paulu muomu ka va lemene linga Paulu ambulule muzimbu ua Yesu. Vunoni vandongesi va kuasele Paulu ku tina. Va mu hakele mu cikasa na ku mu suluisila ha civumbe ca mbonge.

Kaha Paulu ua ile ku Antioka mu ku ambulula. Kukekuo ku va lukilile vakua ku kava Yesu va ku livanga nguavo vaKilistau. Kaha Paulu na Mbanambasa va va tumine ku vifuti via ku laako. Imo ya vimbonge vi va menekele ikeyo Listala, muimbo lia Timoteo.

Vuovuno mu na hiti muaka, kaha Paulu nai ku Listala mu vungendzi vua mu civali. Omo Timoteo ua ile na Paulu na Silase, ua tantekeya ku va ile ni? Tala ha mapa, kaha tu ci tantekeye vimo vihela.

Ha katete, va ile ku Ikoniu, kaha va ile ku mbonge ya mu civali ya Antioka. Fume haze va ile ku Toloase, kaha va ile ku Filipu na ku Tesalonika na ku Mbeleya. Ua mono Atena ha mapa, ni? Paulu ua ambuluile mu mbonge yaco eyi. Fume haze, va ambatele muaka ua mutuntu na vingonde 6 mu ku ambulula ku Kolintu. Mu ku manusula, va tulile ka vundende mu Efeso. Va hilukile na vuato ku Sesaliya, kaha va ile na ku Antioka, kukekuo kua salele Paulu.

Ngeci mukemuo Timoteo uendele makulukazi na makulukazi a vikilometro, mu ku kuasa Paulu ku ambulula “muzimbu ua cili” na mu ku sokolola vikungulukilo via vingi via vakua Kilistu. Mu u ka kola, nove u ka pua ngamba ua cili ua Njambi ngue Timoteo ni?