UA TANTEKEYA ou yala na uila aha ni? Ikeye Saulu. Vuluka nguove ikeye uze ua niungile vikovelo via vaze va asele Setefanu mavue. Tala eci ceke! Vika vi na soloka?

Fume mu va tsihile Setefanu, Saulu ua puile ntuamena ua vakua ku tonda vandongesi va Yesu na ku va yandesa. Ua kele na ku kovela mu ndzivo na ndzivo na ku va tuhula ha mbandza na ku va soka mu tumenga. Vandongesi va vengi va tininine ku vimbonge vieka na ku putuka ku ambuluilako “muzimbu ua cili”. Vunoni Saulu ua ile na ku vimbonge vieka mu ku ka tonda vandongesi va Yesu. Hano honi a li na ku ya ku Ndamasiku. Vunoni mu njila, evi vikevio viuma via ku ko mouesa via mu solokele:

Ceke ca ku fuma muilu ca tuililile Saulu. Ua uililile ha mavu ngue mu tua mono aha. Kaha kua tuhikile lizi ngualio: ‘Saulu, Saulu! Vika u li na ku nji yandesela?’ Vamala va kele na Saulu va muene ceke vunoni ka va hasele ku ivuisisa mezi a va vuile.

Saulu ua hulileko ngueni: ‘Yove iya, Muangana?’

Kaha lizi lia kumbuluile ngualio: ‘Yange Yesu, uze u uli na ku yandesa’. Yesu ua handekele ngecize muomu Saulu mua kele na ku yandesa vandongesi veni, Yesu ua kele na ku ivua ngue ikeye mpundu va li na ku yandesa.

Kaha Saulu ua hulile ngueni: ‘Vika nja pande ku linga, Muangana?

Yesu ngueni: ‘Katuka, kaha kovela mu Ndamasiku. Kaha va ka ku leka vi ua pande ku linga’. Omo Saulu ua katukile, ka hasele ku mona na vimo viahi. Na pu kapuputa! Kaha vamala va kele neni, va mu kuatele ku livoko na ku mu tuala mu Ndamasiku.

Kaha Yesu ua lekele umo ua vandongesi veni va mu Ndamasiku, ngueni: ‘Ananiya, katuka, ya ku njila i va luka ya ku Sungama. Ku ndzivo ya Yunda kaha u ka hulako umo ua lizina lia Saulu. Nji na mu hangula a pue ngamba yange ua ku lifuila’.

Ananiya uononokele. Mua li uanene na Saulu, ua mu salekele mavoko kaha ua handekele ngueni: ‘Muangana na nji tumu kuli ove linga u hase ku mona kaha u sule na sipilitu santu’. Kaha ha meso a Saulu ha lamukile vimo ngue mavanda kaha ua hasele ku mona naua.

Saulu va mu pangesele mu ku ambuluila ku vantu va ku vifuti via vingi. Kaha va mu tantekeyele ha lizina lia kapostolo Paulu tu ka lilongesa via vingi hali ikeye ku lutue. Vunoni, ha katete tu ci tantekeye vika Njambi ua tumine Petulu ku linga.