OU YALA na tsikama aha ikeye Setefanu. Ua pua ndongisi ua cili ua Yesu. Vunoni tala vi na mu solokela! Ava vamala va li na ku mu asa mavue a kama kama. Vika va na zindila Setefanu linga va mu linge vupi vua ku pua ha?. Tu ci vi mone.

Njambi ua kuasele Setefanu ku linga vikomoueso via kama. Ava vamala ka va lemene viuma viaco evi, ngeci va mu sompesele, omo lia ku longesa vusunga ku vantu. Vunoni Njambi ua hele kuli Setefanu mana a engi kaha Setefanu ua muesele ngueni vaze vamala va kele na ku longesa makuli. Aa mezi a vuezelele ku vutenu vuavo. Ngeci va mu kuatele na ku senda vantu linga va ku mu vangeye.

Kaha sasendote ua kama ua hulile Setefanu ngueni: ‘Ava vamala va li na ku handeka vusunga ni?’ Setefanu ua kumbuluileko mu ku hana cimpande ca cili ca mu Mbimbiliya. Mu ku manusula cimpande, ua handekele vati vantu va zindile vapolofeto va Yehova, ku miaka ya ku nima. Kaha ua handekele ngueni: ‘Nenu mu na pu ngue vaze vamala. Mua tsihile Yesu, ngamba ya Njambi, kaha ka mua ononokele ku masiko a Njambi’.

Aa mezi a nienguesele cikuma vakuluntu va malombelo! Va lisumangele ku mazo omo lia vutenu. Kaha Setefanu ua anduile mutue ueni na ku handeka ngueni: ‘Talenu nja mono Yesu na mana ku livoko lia cilio lia Njambi, muilu’. Omo lievi, vaze vamala va zikile matuitui na mavoko avo kaha vose va vundukilile Setefanu. Va mu kuatele va mu kokela ku mbandza ya mbonge.

Kuze va suluile vikovelo viavo via helu kaha va vi hele kuli mukuendze Saulu linga a vi niunge. Ua mono Saulu ni? Kaha vamo vamala va putukile ku asa Setefanu mavue. Setefanu ua tsikamene ha mavu ngue mu u na mono aha, kaha ua vundilile kuli Njambi ngueni: ‘Yehova kati u va hane mulonga omo lia ovu vupi’. Muomu na tantekeya ngueni va vongele kuli vakuluntu va malombelo. Kaha Setefanu ua tsile.

Nga umo a ku linga via vipi, ue ku seteka ku lingula, ni ku vundila linga Njambi a va linguile ni? Ovio kati vikevio via lingile Setefanu cipue Yesu. Vakevo va lingile vucili ambe ku li vaze va va lingile mua mupi. Tua pande ku ka va lungano luavo.