VIKA u li na ku mona aha? Eyo, licivunga lia masualale vali na ku endela ha tuvalu. Vunoni tala ku va li na ku izilila. Va li na ku suluka muilu, ha maselua! Vuno muilu mua kala mpundu tuvalu ni?

Houe, ava kati tuvalu mpundu. Tua tantekeya ngoco, muomu tuvalu ka va hasa kuendela ha maselua, ni vati? Vunoni Mbimbiliya ya handeka nguayo muilu mua kala tuvalu. Ua tantekeya omo lia vika?

Muomu ku ntsimbu ya ku nima tuvalu va likuaseselevo ku vindzita via vingi cikuma. Ngeci mukemuo Mbimbiliya ya handeka ha vantu ku endela ha tuvalu ku fuminina muilu, linga i muese ngecize Njambi a ka lua ndzita na vantu va ha mavu. U tantekeya lizina lia cihela ca ndzita ya Njambi, ni? Va ci luka nguavo Alemangendo. Ikeyo ika nongesa vupi vuose ha mavu.

Yesu Ikeye a ka pua ntuamena mu ku lua eyi ndzita ya Alemangendo. Vuluka nguove Yehova ua hangula Yesu ku pua muangana ua nguvulu Yeni. Ngeci mukemuo Yesu na zala cilongo ca vuangana. Kaha ou mukuale u muesa ngecize a ka tsiha vitozi vose va Njambi. Vuno tua pande ku komoka mu ku tantekeya ngecize Njambi a ka nongesa vantu vose va vapi, ni?

Aci hiluke ha Muzimbu 10. Vika u na monoho? Eyo, hali Livazi lia kama lize lia nongesele vantu. Iya ua nehele Livazi liaco? Yehova Njambi. Tala naua ha Muzimbu 15. Vika vi li na ku lingiuaho? Sondoma na Ngomola va li na ku i nongesa ku tuhia tua ku fuma kuli Yehova.

Fukula ha Muzimbu 33. Tala viuma vi na ku solokela vakua Ingito, na tuvalu vavo na matemba avo a ndzita. Iya ua lingisile mema ku fuika vakua Ingito? Yehova. Ua lingile ngecize linga ohiele vantu veni. Tala ha Muzimbu 76. U mona nguove, vutuhu vaIsaleli vapua vantu va Yehova, Ikeye na tavesa linga va va nongese omo lia vupi vuavo.

Ngeci mukemuo, ka ci tu komouesa ku tantekeya ngecize Yehova a ka tuma civunga ca masualale veni va muilu, mu kua ku manusula vupi vuose ha mavu. Vunoni a ci singanieke vati ci ka fua omo vupi vuose vu ka hua ha mavu! Fukula lifo li na hatako linga tu mone.