Yehova ikeye Muangana ua viose. Ntsimbu yose ue ku tuamenena vipanga vieni, kaha a ka pua na ku vi tuamenena ntsimbu yose. Ca ku muenako, uovuele Yelemiya mu cina ci va mu mbilile linga a tsilemo. Uovuele naua Sandelake, Mesake na Avende-nengo mu tuhia na Ndaniele ku vandumba. Yehova ua niungile Estele linga a hase ku ohiela cifuti cose. Yehova ka ka tavesa vuhenge ku tualelelaho miaka yose. Vupolofeto vua handeka via kamponia ua kama na muti ua kama vua muesa ngecize vuovuno Vuangana vua Yehova vu ka manusulako vuhenge vuose na ku sika mavu.