Vutsiki vumo, Nevukaneza ua kele na cilota ca mu vuisile vuoma. Ngeci ua sanene vamala vakua mana va mu leka vi ca lombolokele cilota caco. Vunoni na umo uahi ua hasele ku lombolola cilota ceni. Kaha ha ku sulumuina, muangana ua handekele na Ndaniele.

Nevukaneza ua lekele Ndaniele ngueni: ‘Mu cilota cange, nja muene muti. Ua kolele cikuma noho ua hetele muilu. Kuose ku va kele vantu ha mavu va hasele ku u mona. Ua kele na mafo a cili na vusuka vua vuingi. Mu cimbembe cauo mua vutamene tusitu. Ku mintango yauo tuzila va tungileko masua. Kaha kangelo ua sulukile muilu, na ku tambakana ngueni: “Lengenu muti na ku salula mintango yauo. Vunoni sezenu cimbundi na mizi yaco ca ku kuta na lilenge lia vutale na nkengelezi. Mutima ua muti uze ua aluluke ku uze ua vuntu, na ku lifua na ua kasitu; kaha ku mu hitile vintsimbu vitanu na vivali. Kaha vantu vose va ka lilongesa ngecize Njambi ikeye Muangana, a hasa ku hana vuangana ku uose ua ya tonda.”’

Yehova ua muesele Ndaniele vi ca lombolokele cilota caco. Vunoni Ndaniele mu ca mu lombolokele vuino, ua vuile vuoma. Kaha ua handekele ngueni: ‘Muangana mu cizango cange, eci cilota tele nga ca vitozi vove, vunoni cove vene. Ou muti u va na lenge uemanena yove. U ka zimbalesa vuangana vuove, kaha u ka lia muila ku mu musenge ngue kasitu. Vunoni mu ku linga kangelo ua sikile ngecize cimbundi va ci seze na mizi yaco, nove u ka hilukila naua ha vuangana.’

Mu nima ya muaka umo, Nevukaneza ua komokele Mbambilone omo ua kele na ku enda helu lia ndzivo ku nganda yeni. Kaha ua handekele ngueni: ‘Tala mbonge i nji na tungu ku vuaha. Mua vusunga nji na pu mukua vukama!’ Vunoni omo ua kele na ku handeka, muilu mua tundile lizi lia handekele ngualio: ‘Nevukaneza! Vuovuno vuangana u na vu zimbalesa.’

Ha ntsimbu ize, Nevukaneza ua zalukile na ku pua ngue kasitu ua ku musenge. Kaha va mu tundisile ku nganda yeni na ku ka yoya na tusitu mu musenge. Vinkambu vieni via kolele ngue mangona a cihungu, kaha viala vieni ngue via ngonga.

 Mu nima ya miaka itanu na ivali, Nevukaneza ua puile muntu ua cili naua, kaha Yehova ua mu puisile naua muangana ua Mbambilone. Ngeci ua handekele ngueni: ‘Ua ku siangaziala Yehova, Muangana ua melu. Vunovuno nja tantekeya ngecize Yehova ikeye Muangana. Ue ku kehesa vakua ku lihalesa, kaha a hasa ku hana vuangana ku uose ya tonda.’