Tu ci vuluke imo miaka ku nima. Nehemiya, ngamba ua Muangana  Aletazeleze, ua puile kaIsaleli ua yoyelele mu mbonge ya Susane ku Pelesia. Muanaye ya Nehemiya ua tundile ku Yunda na mizimbu ya ku pihia ngueni: ‘Vantu va hilukile ku Yelusalema va kele mu vusonde. Muomu vivumbe na vimbelo vi va nongesele kuli vakua Mbambilone ka va ka vi tunguluile.’ Omo Nehemiya ua vi vuile ka viukilile. Ua tondele ku ya ku Yelusalema mu ku ka kuasa, ngeci ua vundilile kuli muangana ngecize a mu tavese linga a yeko.

Mu nima yaco, muangana ua muene ngecize Nehemiya ali mu vusiua. Ngeci ua handekele ngueni: ‘Kanda nji ci ku moneho ngecize. Vika via pihia?’ Kaha Nehemiya ngueni: ‘Vika ka nji kela na vusiua nga mbonge yange Yelusalema ili na ku pihia?’ Kaha muangana ua mu hulile ngueni: ‘Vika u tonda nji ku lingilevio?’ Haze vene, Nehemiya ua vundilile mu mutima na ku handeka ngueni: ‘Sukulukambu, nji tave nji ye ku Yelusalema nji ka tungulule vivumbe.’ Haze vene, Muangana Aletazeleze ua lekele Nehemiya ngueni citava a ye, ngeci muangana ua lingile cose linga vungedzi vueni vu pue vua cili. Cikuavo naua ua puisile Nehemiya nguvulu ua Yunda na ku mu hana vimbelo via matavua via mbonge.

Omo Nehemiya ua ka hetele ku Yelusalema, ua talele vivumbe viose via mbonge. Kaha ua kunguluile vasasendote na vakua ku tuamenena na ku handeka ngueni: ‘Vi na pihia cikuma. Tua pande ku panga.’ Haze vene, vantu vose va tavele, kaha va putukile ku tungulula vivumbe.

Vunoni vamo vitozi va vaIsaleli va va zolele na ku va sahula na ku handeka nguavo: ‘Mbandze a hasa ku uisa vivumbe vi muli na ku tunga.’ Vutuhu ngoco vakua ku tunga va sembuluile mezi avo a kasahuntu na ku tualelelaho ku tunga. Ngeci civumbe ca katukile na ku kaniama.

Vunoni vitozi vavo va lingile vutumbe vua ku iza mu ku luisa Yelusalema ku mitamba ya ku liseza-seza. Kaha omo vaYundeya va vuile vutumbe vuavo, va vuile vuoma. Vunoni Nehemiya ua va lekele ngueni: ‘Kati mu ivue vuoma. Yehova ali netu.’ Ngeci ua hakele tuniungi ku mukulo ua vakua ku tunga linga kati va hase ku va luisa.

 Mu matangua 52, vivumbe na vimbelo via mbonge viose via huile. Kaha Nehemiya ua nehele vaLevi vose ku Yelusalema na ku i kundika. Ua va tepele mu vivunga vivali via vakua ku imba. Kaha vendele ku civumbe ca kele mu hiehi na Mbelo ya ku Lisima na ku caula ku zengeleka mbonge. Va sikile maluneta, zingendzo na halupa na ku imbila Yehova. Ezela uendele na civunga cimo, kaha Nehemiya na cikuavo noho va ka liuanene ku tembele. Vantu vose—vamala, vampuevo na vanike—va hele vikombelo kuli Yehova na ku linga ciuano. Mezi avo a ndzolela va a vuile ku laako.