Mu ku hita ca ntsimbu, Mbelesazale ua puile muangana ua Mbambilone. Vutsiki vumo ua laniene likulukazi lia vamiata vakua vukama mu cifuti ku ciuano. Kaha ua tumine vangamba veni ku neha vingandza via olu vize via ka tambuile Nevukaneza mu tembele ya Yehova. Mbelesazale na vaze vose va laniene va nuininine viniu mu vingandza viaco na ku sangaziala vanjambi vavo. Kaha va tungumuke, va muene livoko lia kama lili na ku soneka ha civumbe mezi a akalu ku a tanda na ku evuisisa mu hondo ya kama ya ku lila.

Mbelesazale ca mu tangele cikuma, ngeci ua sanene vakua mahesi veni na ku va kualahesa ngueni: ‘Uose a nji lomboluela aa mezi, nji ka mu puisa yala ua mu citatu ku vukama mu Mbambilone.’ Vose va setekele, vunoni na umo uahi ua hasele ku mu lomboluela mezi aco. Ngeci mukemuo, umo lisano ua handekele ngueni: ‘Kuli umo yala ua lizina Ndaniele ua kele na ku lombolola viuma kuli Nevukaneza. A hasa ku ku lomboluela aa mezi.’

Kaha omo Ndaniele uezile kuli muangana. Muangana Mbelesazale ua handekele neni ngueni: ‘Nga u tanda na ku nji lomboluela aa mezi, nji ka ku zika lilienge lia mu ntsingo lia olu, kaha u ka pua yala ua mu citatu ku vukama mu Mbambilone.’ Kaha Ndaniele ngueni: ‘Ka nji tondo vuana vuove, vunoni nji ku leka via lomboloka mezi aco. Iso, Nevukaneza, ua lihalesele, ngeci Yehova ua mu kehesele. U tantekeya viose via mu solokelele, vunoni u na muesa lisino kuli Yehova mu ku nuina viniu mu vingandza via olu via mu tembele yeni. Ngeci mukemuo Njambi na soneka aa mezi: Mene, Mene, Tekel, na Upharsin. Mezi aco a lomboloka ngecize vaMende na vaPelesia va ka tambula Mbambilone, kaha ove ka u ka pu muangana naua.’

Mbambilone ya solokele ngue na umo uahi ue ku hasele ku i vula, muomu mbonge yaco ya kele na vivumbe via ku kola na ndonga ya ku lova. Vunoni ku vutsiki vuze vene,  vaMende na vaPelesia va i le mu ku luisa mbonge. Silu Muangana ua Pelesia uomisile ndonga linga masualale veni va hase ku heta ku vimbelo via mbonge. Kaha omo va heteleko, vimbelo va vi uanene via casi! Ngeci masualale va tuvile mbonge na ku i suana, kaha va tsihile muangana. Kaha Silu ua puile muangana ua Mbambilone.

Mu muaka uaco, Silu ua lingile mutambi ngueni: ‘Yehova na nji tumu ku tungulula tembele yeni mu Yelusalema. Kaha uose ngamba yeni a tonda ku ka kuasa na zituka mu ku yako.’ Ngue mua kulahesele Yehova, cingi ca vaYundeya va hilukile kuimbo liavo mu nima ya miaka 70 tunde ha ku nonga ca Yelusalema. Kaha Silu ua hiluisile vingandza via olu na palata na vitenga vikuavo via tambuile Nevukaneza mu tembele. Ua mono vati Yehova ua pangesele Silu mu ku kuasa vangamba veni ni?