Vintsimbu via vingi, vakua Yunda va sile Yehova na ku lemesa vanjambi va makuli. Vunoni mu miaka ya yingi, Yehova ua tualeleleho ku seteka ku va kuasa. Ua kele na ku tuma vapolofeto mu ku va mamuna, vunoni ka va halakanene. Va puile na ku sahula vapolofeto. Vati Yehova ua manusuileko ku lemesa ca tumponia?

Nevukaneza, muangana ua Mbambilone, ua kele na ku vula vifuti cimo ku cimo. Lua ku livanga mua vulile Yelusalema, ua kuatele Muangana Yehoyakine, vamiata, masualale, vamesele na ku va tuala vose ku Mbambilone. Ua tambuile naua vupite vuose mu tembele ya Yehova. Kaha, Nevukaneza ua puisile Zendekiya muangana ua Yunda.

Ha katete, Zendekiya uononokele Nevukaneza. Vunoni vifuti vi va lihatele navio na vapolofeto va makuli va lekele Zendekiya ku muesa lisino kuli muangana ua Mbambilone. Vutuhu ngoco, Yelemiya ua mu mamuine ngueni: ‘Nga u muesa lisino, mu Yunda mu ka tsa vantu vavengi, kaha mu ka kovela ndzala na mavezi.’

Mu nima ya ku sika miaka itanu na itatu, Zendekiya ua putukile ku muesa lisino kuli muangana ua Mbambilone. Ua vundilile masualale va ku Ingito linga va mu kuase. Ngeci Nevukaneza ua tumine masualale veni ku luisa Yelusalema, kaha va zingilikile mbonge. Yelemiya ua lekele Zendekiya ngueni: ‘Nga u lihana kuli vakua Mbambilone, u kovoka hamo lika na mbonge. Vunoni nga ka u lihana, vakua Mbambilone va ka tsimika Yelusalema, kaha ove va ka ku soka mu kamenga.’ Kaha Zendekiya ngueni: ‘Ka nji lihana!’

 Mu nima ya muaka na vingonde vitanu na imo, masualale va Mbambilone va puzuile vukovelelo mu vivumbe via Yelusalema na ku uemeka mbonge. Va uemekele tembele, va tsihile vantu vavengi na ku ambata makulukazi a vaze va lisupileho va ka pue vindzinda.

Ngeci, Zendekiya ua sevunukile ku tunda mu Yelusalema, vunoni vakua Mbambilone va mu kavele. Va ka mu kuatelele mu hiehi na Yeliko na ku mu neha kuli Nevukaneza. Kaha muangana ua Mbambilone ua lingisile Zendekiya ku mona na meso eni mu va tsihile vana veni. Mu nima yaco, Nevukaneza ua tuvile Zendekiya meso na ku mu soka mu kamenga, mu nima yaco ua tsile vene muze. Vunoni Yehova ua kulahesele vakua Yunda ngueni: ‘Mu nima ya miaka 70, nji ka mi hiluisa kuimbo lienu ku Yelusalema.’

Vika via solokelele vakuendze va va tualele ku vundzinda ku Mbambilone? Vuno va tualeleleho ku kakatela kuli Yehova ni?