Elizambeta ua kele na kavusoko keni ua mpuevo lizina lieni Maliya, ua kele mu mbonge ya Nazaleta mu Ngalileya. Maliya va mu lamene kuli Yosefe ua puile kalupindelu. Omo Elizambeta ua kulisile vingonde vitanu na imo, kangelo Ngambiele ua solokele kuli Maliya. Kaha ua mu lekele ngueni: ‘Hinduka, Maliya. Yehova na ku vezikisa cikuma.’ Via handekele Ngambiele ka via lombolokele Maliya. Ngeci ua vuezeleko ngueni: ‘U kemita na ku sema muana ua yala, ua pande ku ka mu luka Yesu. A ka pua Muangana. Vuangana vueni vu ka kalako ku miaka yose.’

Vunoni Maliya ngueni: ‘Ange kanda nji ci limoneho na yala. Vati nji ka hasa ku kala na muana?’ Kaha Ngambiele ngueni: ‘Kuli Yehova ka kua kele cuma ca cikalu. Sipilitu santu i keza hali ove, kaha u ka sema muana ua yala. Kavusoko kove Elizambeta neni nemita.’ Kaha Maliya ngueni: ‘Ange nji ngamba ya Yehova. Viose vi u na tumbula vi lingike kuli ange.’

 Maliya ua ile ku mbonge ya kele ha mincinda mu ku meneka Elizambeta. Omo Maliya ua mu menekele, Elizambeta ua vuile muana muzimo lieni a tumbuka. Kaha ua sulile na sipilitu santu na ku handeka ngueni: ‘Maliya Yehova na ku vezikisa. Ci na pu ku vezika ca kama kuli ange ku tambula naye ya Muangana uetu ha ndzivo yange.’ Kaha Maliya ngueni: ‘Nji sangala Yehova na mutima uange uose.’ Maliya ua vandamene kuli Elizambeta vingonde vitatu, kaha ua hilukile ku Nazaleta.

Omo Yosefe ua tantekeyele ngecize Maliya ali na lizimo, ua tondele ku mu ecela. Vunoni kangelo ua mu solokelele mu cilota na ku mu leka ngueni: ‘Kati u ivue vuoma vua ku mu ambata. Ka lingile vupi na vumo vuahi.’ Ngeci Yosefe ua ambatele Maliya ku pua mpueyeni.