Mu nima ya ntsimbu ya indende tunde ha ku mu mbatiza, Yesu ua putukile ku ambulula, ngueni: ‘Vuangana vua Njambi vuli mu hiehi.’ Vandongesi va mu kavele omo ua hitanganene mu Ngalileya na Yundeya. Omo Yesu ua hilukile ku mbonge yavo ku Nazaleta, ua ile mu sinangonga ua fukuile lizengununo lia Isaya, na ku tandamo na lizi lia kama, ngueni: ‘Yehova na nji hana sipilitu santu linga nji ambulule muzimbu ua cili.’ Vika a lomboloka aa mezi? A lombolokele ngecize ambe nga vantu va tondele Yesu a linge vikomoueso, vutumbe vua kama vua tambuilile sipilitu santu vua puile ku ambulula muzimbu ua cili. Kaha ua lekele vakua ku mu halakana ngueni: ‘Ovu vupolofeto vu na lipuisamo lelo.’

Kaha Yesu ua ile ku cisali ca ku Ngalileya, kuze kua uanene vandongesi vauana va puile vakua ku kuata vantsi. Kaha ua va laniene, na ku va leka ngueni: ‘Nji kavenu, nji ka mi puisa vakua ku kuata vantu.’ Mazina avo Petulu, Anduleo, Tiango na Yoano. Mu ntsimbu ize vene va sile mingoso ya vantsi na ku mu kava. Va hitanganene mu Ngalileya yose na ku ambulula muzimbu ua Vuangana vua Yehova. Va ambuluilile mu visinangonga, ha vitanda na mu vinjila. Kaha civunga ca kama ca kele na ku va kava kuose ku va ile. Muzimbu ua Yesu ua lisanduokele kuose, ua hetele na ku Silia.

Mu nima ya ntsimbu, Yesu ua hanene vandongesi veni ngolo ya ku kanguisa vantu na ku tundisa vandemone. Vakuavo va ile neni omo ua ambuluile mu mbonge ku mbonge na limbo ku limbo. Kua kele vamo vampuevo vakua lutsilielo va mu kavele, ngeci mua Maliya Mandalena, Yoana, Suzana na vakuavo kaha va kele na ku pangela Yesu na vandongesi veni.

Mu nima ya ku longesa vandongesi veni, Yesu ua va tumine mu ku ambulula. Mu va kele na ku hitangana mu Ngalileya, vavengi va puile vandongesi va Yesu kaha va va mbatizile. Vantu va vengi-vengi va tondele ku pua vandongesi ngeci Yesu ua va setekesele ku lihia lia vimbuto via ku hia vi tondeka ku vi tia. Ua handekele ngueni: ‘Vundilenu kuli Yehova a tume vakua ku tia vavengi va ku tie vimbuto.’ Mu nima ya ntsimbu ua hanguile vandongesi 70 na ku va  tuma vavali vavali va ka ambulule mu Yundeya yose. Va longesele via Vuangana ku vantu va vifua viose. Omo vandongesi va hilukile, va vuile ndzolela ya ku leka Yesu vi va muene. Ka kua kele na vimo viahi via hasele ku linga Ndiavu mu ku imika cipanga ca ku ambulula.

Yesu ua lingile cose, linga vandongesi veni va tualeleho ku linga eci cipanga ca seho mu nima ya ku hiluka ceni muilu. Ua va sikile ngueni: ‘Ambululenu muzimbu ua cili mu mavu ose. Longesenu vantu via Lizi lia Njambi na ku va mbatiza.’