Mu nima ya Pasovala, Yesu na vandongesi veni va hitile mu Samaliya tele va hiluka ku Ngalileya. Mu va hetele ku hiehi na mbonge ya Sikala, Yesu uemanene ha cihela ci va lukile nguavo lisima lia Yakomba. Omo Yesu ua kele na ku huima ha lisima, vandongesi veni va ile mu mbonge mu ku landa via-ku-lia.

Umo mpuevo uezile ha lisima mu ku tekula mema. Kaha Yesu ua mu lekele ngueni: ‘Nji haneko mema a ku nua.’ Kaha mpuevo ua mu kumbuluile ngueni: ‘Vika uli na ku nji handekesela? Ange nji mpuevo ua ku Samaliya. VaYundeya ka ve ku handeka na vakua Samaliya.’ Yesu ua mu lekele ngueni: ‘Nga u na nji tantekeyele, nga u na nji vundila mema, kaha nga nja ku hana mema a muono.’ Kaha uze mpuevo ua mu hulile ngueni: ‘Vati naua omuo? Ove na civela ka uesi naco.’ Yesu ua mu lekele ngueni: ‘Uose a nua ku mema a nje ku hana ka kevu mpuila naua.’ Kaha Mpuevo ua mu vundilile ngueni: ‘Muangana, nji haneko mema aco.’

Ngeci Yesu ua mu lekele ngueni: ‘Ya u ka hiange yaliove eze kuno ku lisima.’ Kaha ikeye ngueni: ‘Ka nja kele na yala.’ Yesu ua handekele ngueni: ‘U na handeka vusunga. Ua sombokele lutanu, kaha yala i uli neni ntsimbu ino ka ku ambatele.’ Kaha mpuevo ngueni: ‘Nkuma u kapolofeto. Etu vakua Samaliya tua tsiliela ngecize tu hasa ku lemesela Njambi ha muncinda ou, vunoni vaYundeya nguavo citava lika ku mu lemesela ku Yelusalema. Vutuhu ngoco nja tsiliela ngecize tangua a keza Mesiya a ku tu longese njila ya cili ya ku lemeselamo.’ Kaha Yesu ua mu lekele vimo ka lekele ku vantu veka, ngueni: ‘Yange Mesiya.’

 Uze mpuevo ua tuntilile mu mbonge mu ku ka leka vakua Samaliya ngueni: ‘Vakuetu nji mona nji na uana Mesiya. A tantekeya viose hali ange. Tuyenu mu ka mu tale!’ Kaha mbunga va mu kavele ku lisima na ku halakana kuli Yesu.

Vakua Samaliya va laniene Yesu a vandame mu mbonge yavo. Kaha ua longesele mu mbonge ize matangua avali, vavengi va mu tsilielele. Ngeci va lekele uze mpuevo ua mu Samaliya, nguavo: ‘Mu nima ya ku halakana ou yala, tua tantekeya nguetu ikeye mpundu muovole ua mavu.’