Yesu mu nima ya ku mu mbatiza, sipilitu santu ya mu tualele mu mpambo. Ua kele matangua 40 ca ku hona ku-lia, kaha ua vuile ndzala ya kama. Ngeci Satana uezile mu ku eseka Yesu na ku handeka ngueni: ‘Nga cili u muana Njambi, leka aa mavue a himpuke mbolo.’ Vunoni Yesu ua mu kumbuluile mu ku tumbula mezi a mu visoneka na ku handeka ngueni: ‘Va na soneka nguavo, kati mbolo lika i yoyesa muntu, vunoni na mezi ose a ku tunda mu kanua ka Njambi.’

Ku ntsimbu ikuavo naua, Ndiavu uesekele Yesu ngueni: ‘Nga cili u muana Njambi, limbile ha mavu ya tembele. Muomu va na soneka nguavo Njambi a ka sika tungelo veni va ku kavuile.’ Vunoni Yesu ua tumbuile naua visoneka ngueni: ‘Va na soneka nguavo ka ua pandele ku eseka Yehova.’

Kaha Satana ua lekesele Yesu mavuangana ose a ha mavu na vupite na vumpahu vuao, ngueni: ‘Nji ka ku hana aa mavuangana ose na vumpahu vuao nga u nji lemesa lumo lika.’ Vunoni Yesu ua mu kumbuluile ngueni: ‘Satana katuka uye! Va na soneka nguavo ua pande ku lemesa lika Yehova.’

Haze vene Ndiavu ua mu sile, kaha tungelo vezile na ku hana via-ku-lia Yesu. Ku tunda ha ntsimbu ize, Yesu ua ka ambuluile muzimbu ua cili ua Vuangana. Muomu cikeco cipanga ci va mu tumine ku linga ha mavu. Vantu va lemene via longesele Yesu, ngeci va kele na ku mu kava kuose kua ile.