Mu nima ya ku ambulula muaka umo na vingonde vitanu na imo, yesu ua kele na vutumbe vua kama vua pandele ku puisamo. Veya ua pandele ku hangula va pangele hamo neni? Veya ua pandele ku longesa linga va tuamenene cikungulukilo ca Vakua Kilistu? Linga a hase ku vi puisamo, Yesu ua tondele ku tuamenena ca Yehova. Ngeci ua ile ku muncinda kuze kua hasele ku kala lika lieni, kaha ua vundilile vutsiki vuose. Lia mukuavo cimene, Yesu ua sanene vamo vandongesi veni na ku hangulaho vapostolo 12. U vulukako vamo ha mazina ni? Mazina avo Petulu, Anduleo, Tiango, Yoano, Filipu, Mbatolomeo, Tomasi, Mateo, Tiango muana Alefeu, Tandeo, Simone na Yundasa Iskaliota.

Vaze Likumi na Vavali vendele mangendzi hamo lika na Yesu. Mu nima ya ku va longesa, ua va tumine va ka ambulule lika liavo. Yehova ua va hanene ngolo ya ku tundisa vandemone na ku saka vantu.

Yesu ua kele na ku sana ava Likumi na Vavali ngueni vavusamba veni, kaha ua va kulahelele. VaFaliseo va singaniekele nguavo vapostolo ka va lilongesele, kaha vantu nkala. Vunoni Yesu ua va  longesele mua ku lingila cipanga cavo. Va kele na Yesu mu vintsimbu via seho ya kama mu muono ueni, ngeci tele a lingila ku-tsa na mu nima ya ku sanguka ceni. Ngeci mua Yesu, cingi ca vaze Likumi na Vavali va puile vakua Ngalileya. Vamo va kele na vampuevo.

Vapolostolo ka va puile va ku tantuluka, kaha va kele na ku sevuka. Vintsimbu vimo va kele na ku handeka ca ku hona ku singanieka na ku hangula viuma via ku pihia. Vintsimbu vimo ka va muesele lukakatela. Va kele na ku licokota ku tuala hali iya ua hianene vakuavo. Vunoni va puile vakua vucili, kaha va lemene Yehova. Vakevo va puile luvula lua cikungulukilo ca Vakua Kilistu mua hilukile Yesu muilu.