Mu muaka ua 30 T.K.N., Yesu ua ile ku Yelusalema. Vantu va vengi vezile mu mbonge mu ku hitisa cilika ca Pasovala. Ku cilika caco, vantu va kele na ku linga vikombelo via tusitu ku tembele. Vamo vambatele tusitu vavo vavene, vakuavo co va lingile va ku landa mu Yelusalema.

Vunoni omo Yesu ua ile ku tembele, ua muene vantu vali na ku landesa tusitu mu tembele. Va lingile vimbongo via vingi mu ndzivo ya Yehova ya ku lemesela! Kaha vati ua lingile Yesu omo ua va muene? Ua pangele likote lia mikole na ku tuhula vampanga na vangombe mu tembele. Ua fulumikile  vimesa via vimbongo via vakua ku landakana na ku vi sanduola. Kaha Yesu ua lekele vakua ku landesa mavembe ngueni: ‘Fumisenu viuma evi muno; kati mu puise ndzivo ya Tata ndzivo ya mingoso.’

Omo vantu va muene via lingile Yesu mu tembele va komokele. Vunoni vandongesi veni va vulukile vupolofeto vua handeka ku tuala hali Mesiya nguavuo: ‘Nji ka kala na tuima na ndzivo ya Yehova.’

Mu muaka ua 33 T.K.N., Yesu ua lelesele naua tembele ntsimbu ya mu civali. Ka tavesele na umo uahi ku muesa kasahuntu ku ndzivo ya Ise.