Yoano ua kele na ku ambulula ngueni: ‘Uze ua nji hiana ange ku vukama ali na ku iza.’ Omo Yesu tele a lingila ku kala na miaka 30, ua tundile ku Ngalileya na ku ya ku ndonga ya Yondau kua kele na ku mbatizila vantu Yoano. Yesu ua tondele Yoano a mu mbatize, vunoni Yoano ua handekele ngueni: ‘Kati yange nja pande ku ku mbatiza. Yove ua pande ku nji mbatiza.’ Yesu ua lekele Yoano ngueni: ‘Yehova a tonda yove u nji mbatize.’ Ngeci va kovelele mu Ndonga ya Yondau, kaha Yoano ua ka mbuitikile Yesu mu mema.

Mu nima ya ku tuntuka mu mema, Yesu ua vundilile. Ha ntsimbu ize vene, melu a sokolokele, kaha sipilitu ya Njambi ya sulukile hali ikeye ngue livembe. Kaha Yehova ua handekele ngueni: “Ove u muanange i nja lema; ove ua nji ya ku mutima.”

Omo sipilitu ya Yehova ya sulukile hali Yesu, ua puile Kilistu, ni Mesiya. Kaha ua hasele ku putuka cipanga ca mu tumine Yehova ku linga ha mavu.

Ku tunda ha mbatizimu yeni Yesu ua ile mu mpambo, ua ka keleko matangua 40. Mua ka hilukile ua ile kuli Yoano. Omo Yesu ua kele na ku mu suena, Yoano ua handekele ngueni: ‘Ou ikeye Muana Mpanga ua Njambi uze a ka ambata vupi vua vakua mavu.’ Yoano mu ku handeka aa mezi, ua lekele vantu ngecize Yesu ua puile Mesiya. Ua tantekeya vika via solokele kuli Yesu omo ua kele mu mpambo ni? Tu ci vi tantekeye.