VaFaliseo va zindile Yesu, kaha va mu tondelele mulonga linga va mu kute. Va handekele nguavo ka pandele ku saka vantu lia Sapalalo. Tangua limo lia Sapalalo, Yesu ua uanene kapuputa ali na ku lomba milambu mu njila. Ua lekele vandongesi veni ngueni: ‘Talenu vati ngolo ya Njambi i kuasa ou yala.’ Ngeci Yesu ua nonele livu, ua li tika na malendzi eni, kaha ua kuitile ha meso a uze yala. Kaha ua mu lekele ngueni: ‘Ya u ka tane ha meso ku cisali ca Siloami.’ Uze yala ua lingilemo, kaha ua putukile ku mona lua ku livanga tunde muzimo lia naye.

Vantu ca va tangele. Va handekele nguavo: ‘Ou yala ikeye vene uze ua kele na ku tumama na ku lomba vuana, ni ku lifua ca ngoco?’ Kaha ikeye ua handekele ngueni: ‘Yange vene nja semukile na vupuputa!’ Kaha vantu va mu hulile nguavo: ‘Vati honi u na putuka ku mona?’ Mua va lomboluelele viose via solokele, va mu tualele ku vaFaliseo.

Kaha yala ua lekele vaFaliseo ngueni: ‘Yesu ua nji kuitile livu lia ku tika na malendzi ha meso, kaha ua nji lekele nji ka tane ku meso. Nja lingilemo, ngeci nji na putuka ku mona.’ VaFaliseo va mu lekele nguavo: ‘Nga Yesu ue ku saka lia Sapalalo, kaha ngolo yeni kati ya kuli Njambi.’ Vunoni vakuavo va handekele nguavo: ‘Nga ngolo yeni kati ya kuli Njambi, nga ka hasele ku saka na umo uahi.’

Ngeci vaFaliseo va sanene visemi va uze yala na ku va hula nguavo: ‘Vati muanenu na putuka ku mona?’ Visemi  veni va vuile vuoma muomu vaFaliseo va handekele laza nguavo uose a tsiliela muli Yesu va ka mu tundisa mu sinangonga. Ngeci va kumbuluile nguavo: ‘Netu ka tu tantekeya. Mu hulenu ikeye ivene.’ VaFaliseo va lingile uze yala vihula via vingi cikuma, noho ua handekele ngueni: ‘Nja mi leka vusunga vuose. Vika muli na ku nji ihuila naua? VaFaliseo va nienguele cikuma, kaha va mu sekuile.

Yesu ua ka tondele uze yala na ku mu hula ngueni: ‘Ua tsiliela muli Mesiya ni?’ Kaha ikeye ngueni: ‘Nga nja mu tantekeyele nga nja mu tsiliela.’ Kaha Yesu ngueni: ‘Yange Mesiya.’ Mua vusunga Yesu ua mu muesele ngozi, ni vati? Muomu ka mu kanguisile lika, vunoni ua mu kuasele naua ku kala na lutsilielo.