Yesu ka kanguisile lika vavezi na ku sangula vatsi vunoni ua hasele naua ku ononuesa luhundzi na niondzi. Mu nima ya ku vundila ha muncinda, Yesu ua talele ku cisali ca Ngalileya, kaha ua muene luhundzi na mancimba a kama. Vapostolo veni va kele mu vuato mu ku pinda na mancimba aco, muomu va kele na ku zavula oku va talekesa muze mu tunda luhundzi. Yesu ua sikulukile na ku enda helu lia mema ku talekesa ku vuato vuavo. Omo vapostolo va muene muntu ali na ku enda helu lia mema, va komokele cikuma. Vunoni Yesu ua va lekele ngueni: ‘Yange. Kati mu ivue vuoma.’

Kaha Petulu ua handekele ngueni: ‘Muangana, nga yove mpundu, nji sane nji ize kuli ove.’ Yesu ua kumbuluile Petulu ngueni: ‘Tuaya.’ Vutuhu tele kuli luhundzi na mancimba a kama, Petulu ua sulukile mu vuato na ku putuka kuenda helu lia mema mu ku ya kuli Yesu. Vunoni Petulu mua hetele ku hiehi neni, ua talele ku luhundzi na mancimba, kaha ua vuile vuoma ngeci ua putukile ku vombela. Ngeci mukemuo, ua tambakanene ngueni: ‘Muangana, njovole!’ Haze vene, Yesu ua mu kuatele ku livoko ngueni: ‘Vika u na lingila vimpata? Lutsilielo luove luli kulihi?’

Mu nima yaco, Yesu na Petulu va londele mu vuato, kaha haze vene luhundzi na mancimba via likelele. Ua tantekeya vati vapostolo va vuile? Va handekele nguavo: ‘Ove cili vene u Muana Njambi.’

Kati ntsimbu eyi lika Yesu ua hasele ku ononuesa luhundzi na mancimba. Ntsimbu ikuavo, Yesu ua ile na vapostolo veni mu sinia lia cisali vunoni ua kosele ku nima ya vuato. Omo ua kele mu tulo, kua katukile luhundzi lua kama. Mancimba a kele na ku veta ha vuato, kaha mema a kovelele mu vuato. Kaha vapostolo va hinduile Yesu nguavo: ‘Mulongisi, vuovuno tu tsa! Tu kuase!’ Yesu ua hindukile na ku leka cisali ngueni: “Holoka kulu!” Kaha luhundzi na mancimba via likelele. Yesu ua hulile vapostolo ngueni: ‘Lutsilielo luenu luli kulihi?’ Kaha va handekele kuli umo na mukuavo nguavo: “Luhundzi na cisali navio vie ku mu ononoka.” Vapostolo va lilongesele ngecize nga va tsiliela mpundu Yesu, ka va ka kala na vuoma na vumo vuahi.